მედია გამოცემა JNEWS-ის ცნობით, 21 აგვისტოს, ახალქალაქში მოხდარი აფეთქების შემდეგ, დეპუტატმა ენზელ მკოიანმა, შესაძლოა, საპარლამენტო არჩევნებზე თავისი კანდიდატურა დამოუკიდებელ დეპუტატად წარადგინოს.

ადგილობრივი მედიის კითხვაზე, აპირებს თუ არა, მოქმედი დეპუტატი ქართული ოცნებიდან, მომხდარის შემდეგ 2020 წლის ოქტომბრის საპარლამენტო არჩევნებში მონაწილეობას, მან განაცხადა, რომ მას არ უნდა მონაწილეობა, თუმცა ხალხს — უნდა.

''ალბათ, ამდენი შემთხვევის შემდეგ დამოუკიდებელ დეპუტატად დავრეგისტრიდები. დღეს მე ვხედავ, რომ ყოველ კვირა რაღაც ხდება ჩემ გარშემო'', — განაცხადა მკოიანმა.

ენზელ მკოიანი ქართული ოცნების მოქმედი მაჟორიტარი კანდიდატია. ის საქართველოს პარლამენტის დეპუტატი 1999-წლიდან დღემდეა. 31 ოქტომბერს გასამართ 2020 წლის საპარლამენტო არჩევნებზე ქართულმა ოცნებამ მაჟორიტარ კანდიდატად ახალქალქსა და ნინოწმინდაში სამველ მანუკიანი დაასახელა.

21 აგვისტოს დეპუტატ ენზელ მკოიანის ძმის მარდუნ მკოიანის მერსედესის მარკის მანქანა აფეთქდა. შემთხვევა სამცხე-ჯავახეთის უნივერსიტეტთან მოხდა. შედეგად არავინ დაშავებულა.

სავარაუდოდ, გამოძიების შემდეგ დადგინდება უკავშირდება თუ არა მომხდარი, ახალქალაქში 26 მარტის შეიარაღებულ დაპირისპირებას, სადაც პარლამენტის წევრის ძმისშვილი მონაწილეობდა.

ახალქალაქში გადაღებულ კადრებში, რომელიც რამდენიმე კვირის წინ გავრცელდა, ჩანს თუ როგორ ისვრიან ქართული ოცნების დეპუტატი ენზელ მკოანი და მისი ძმისშვილი პეტროსიანების მისამართით.

ახალქალაქში მოქმედ და ყოფილ დეპუტატებსა და მათ ნათესავებს შორის დაპირისპირება მიმდინარე წლის მარტში დაიწყო. მომხდარზე მაშინ 2 პირი დააკავეს და შსს-მ გამოძიება ჯგუფურად განხორციელებული ძალადობისა და იარაღის მართლსაწინააღმდეგო შეძენა-შენახვა-ტარების მუხლებით დაიწყო (126-ე მუხლის 1¹ ნაწილის "ბ" ქვეპუნქტით და 236-ე მუხლის მე-3 და მე-4 ნაწილებით.)