ლელო საქართველოსთვის ერთ-ერთი ლიდერი ანა ნაცვლიშვილი "გახარიას "გათეთრების" უბადრუკ მცდელობად" აფასებს პროკურატურის განცხადებას იმის შესახებ, რომ მამუკა ხაზარაძის მიმართ ე.წ. მუქარის წერილზე პრემიერმინისტრის, გიორგი გახარიას თითის ანაბეჭდები არ აღმოჩნდა. ნაცვლიშვილის თქმით, აღნიშნული დასკვნის გამოქვეყნების დრო არჩევნებამდე 2 თვით ადრე პერიოდს "უცნაურად ემთხვევა".

ლელო მოითხოვს, დადგინდეს, თუ ვისი ანაბეჭდები იყო წერილზე.

"პროკურატურამ უნდა მიიყვანოს გამოძიება ბოლომდე და თავი დაანებოს პოლიტიკურ მანიპულაციას არჩევნებამდე ორი თვით ადრე პრემიერის გათეთრების მცდელობებს და პასუხი გასცეს კითხვებს, ვის ეკუთვნის წერილზე დადასტურებული 20 ავთენტური ანაბეჭდი, რომელიც დადასტურდა ლონდონში და ამ პროკურატურის პირობებშიც კი ვერ უარყო საგამოძიებო სისტემამ", — აცხადებს ანა ნაცვლიშვილი.

საქართველოს პროკურატურის განცხადებით, დაქტილოსკოპიური ექსპერტიზის შედეგებით დადგინდა, რომ ბადრი ჯაფარიძისა და მამუკა ხაზარაძისთვის გაგზავნილ მუქარის წერილის დედანზე გიორგი გახარიას თითის ანაბეჭდები არ აღმოჩნდა. პროკურატურის ცნობით, წერილის დედანზე ექსპერტიზა სამხარაულის სასამართლო ექსპერტიზის ეროვნულმა ბიურომ ჩაატარა. ექსპერტიზისთვის წერილის გადაცემამდე კი, მამუკა ხაზარაძემ წერილის დედანი საკვლევად ბრიტანულ კერძო კომპანიას გადაუგზავნა.

პროკურატურის ინფორმაციით, ბრიტანული კომპანიისა და სამხარაულის ექსპერტიზის ბიუროს დასკვნები ერთმანეთს ემთხვევა.

ფოტო: პროკურატურა

გიორგი გახარიასგან სავარაუდოდ მუქარის წერილის მიღების შესახებ თიბისი ბანკის დამფუძნებელმა, მამუკა ხაზარაძემ გასული წლის 4 მარტს პარლამენტში გამოსვლის დროს ისაუბრა. წერილთან დაკავშირებით პროკურატურამ მამუკა ხაზარაძე სასამართლოში გამოკითხა.