შაქარაშვილის საქმეზე ბრალდებული არასრულწლოვანი ზ.ხ პროცესის მიმდინარეობისას შეუძლოდ გახდა, რის შემდეგაც სასამართლო სხდომა დროებით შეჩერდა. ამის შესახებ, მცხეთის რაიონული სასამართლოს ეზოში ჟურნალისტებს ადვოკატებმა აცნობეს.

"მოგეხსენებათ, ზ.ხ. დღეს მეოთხე დღეა შიმშილობს, როგორც ჩანს მისი ჯანმრთელობის მდგომარეობა დამძიმდა. მან განგვიცხადა, რომ აქვს თავბრუსხვევა და ვერ შეძლებს პროცესზე მონაწილეობის მიღებას. გამოძახებული იქნა სასწრაფო, გაეწევა მას პირველადი დახმარება და შემდეგ მიიღებს გადაწყვეწტილებს, შეძლებს თუ ვერ შეძლებს ამ პროცესში მონაწილეობის გაგრძელებას. შესაბამისად, ჩვენც დაველოდებით ექიმების რეკომენდაციას, რას გვეტყვიან. ზ.ხ.-ს სურს აღნიშნულ პროცესში მონაწილეობა და თუ ჯანმრთელობის მდგომარეობა ხელს შეუწყობს პროცესი გაგრძელდება", — განაცხადა ზ.ხ.-ს ადვოკატმა, გიორგი გელხაურმა.

რამდენიმეწუთიანი შესვენების შემდეგ პროცესი ისევ განახლდა და ამ წუთებში მიმდინარეობს.

გიორგი შაქარაშვილის საქმეზე, დღეს, 21 აგვისტოს მცხეთის რაიონულ სასამართლოში, საქმის მოწმეების დაკითხვა დაიწყო. დავით ყაზარაშვილმა სხდომის დაწყებამდე ჯურნალისტებს დაუდასტურა, რომ დღეს მათ მოწმეებად აგარაკზე მყოფი პირები ეყოლებათ.

20 აგვისტოს, არსებითი სხდომის დასრულების შემდეგ ადვოკატებმა განაცხადეს, რომ სასამართლო პროცესები ყოველდღიურ რეჟიმში, 21, 24 და 25 აგვისტოს ჩაინიშნა. ერთ-ერთი ბრალდებულის ზ.ხ.-ს ადვოკატმა ეს შეაფასა, როგორც გადაწყვეტილება, სადაც "არცერთი არასრულწლოვნის საუკეთესო ინტერესები გათვალისწინებული არ არის".

ადვოკატის თქმით, უკვე სამი არასრულწლოვანი შიმშილობს: ზ.ხ., ლ.შ. და ა.ქ. გელხაურის განცხადებითვე, ზ.ხ-სა და ლ..შ-ს კამერებიდან ტელევიზორები წაართვეს. საქმის პროკურორის, დავით ყაზარაშვილი აღნიშნულს არ ადასტურებს და ამბობს, რომ მას სჯერა ამას არავინ გააკეთებდა.

შაქარაშვილის საქმეზე დაკავებული 6 არასრულწლოვნის საქმე გამოძიებამ ცალკე გამოყო. მათგან ოთხს — ნ.ც.-ს; ლ.შ.-ს; ნ.ქ.-ს და გ.მ.-ს გამოძიება ედავება ჯგუფური ძალადობის ორგანიზებას, ძალადობაში მონაწილეობასა და თავისუფლების უკანონო აღკვეთას. ხოლო მათგან ორს — ზ.ხ.-ს და ა.ქ.-ს გარდა ამ მუხლებისა, გამოძიება ედავება განზრახ ჯგუფურად ჩადენილ მკვლელობას.

პროკურატურამ შაქარაშვილის საქმეზე ბრალდებულ ხუთ ადამიანს ბრალი 11 აგვისტოს დაუმძიმა. ვახტანგ ჩიქოვანს, ნიკოლოზ რევაზიშვილს, არჩილ გაგნიძესა და არასრულწლოვნებს: ზ.ხ.-და და ა.ქ.-ს გამოძიება დამამძიმებელ გარემოებებში განზრახ მკვლელობას ედავება. კერძოდ, პროკურატურა ამბობს, რომ მათ გიორგი შაქარაშვილი სცემეს და შემდეგ მდინარეში გადააგდეს, რა დროსაც ის გარდაიცვალა.