ძაღლის გასეირნება კვირაში ორჯერ, ჯამში ერთი საათით მაინც, შესაძლოა, მალე კანონად იქცეს გერმანიაში.

ამასთანავე, შესაძლოა, აიკრძალოს ძაღლის დიდი ხნით დაბმაც.

რეგულაციებით შეიზღუდება ეგრეთ წოდებული "ლეკვების ფერმების" საქმიანობაც, სადაც მომშენებლებს აეკრძალებათ ერთდროულად სამზე მეტი ლეკვის პატრონობა.

"ცხოველები სათამაშოები არ არიან, მათი საჭიროებები აუცილებლად უნდა გავითვალისწინოთ", — მოსალოდნელ ცვლილებებზე საუბრისას აღნიშნა სოფლის მეურნეობის მინისტრმა, იულია კლიოკნერმა.

"არანაირი კაკუნი კარზე"

დაგეგმილი სამომავლო რეგულაციებით ძაღლის პატრონებს მოეთხოვებათ:

  • წაიყვანონ ძაღლი სასეირნოდ კვირაში ორჯერ, ჯამში ერთი საათით მაინც.
  • არ ჰყავდეთ ძაღლი დაბმული დიდი ხნის განმავლობაში.
  • არ დატოვონ ძაღლი მარტო მთელი დღის განმავლობაში.

მომშენებლებს აეკრძალებათ სამზე მეტი ლეკვის პატრონობა, ლეკვებმა კი დღეში ოთხი საათი მაინც უნდა გაატარონ ადამიანის გარემოცვაში, რათა მათი სოციალიზაციის უზრუნველყოფა მოხერხდეს.

კლიოკნერის თქმით, ეს რეგულაციები ცხოველების დასაცავად და კეთილდღეობისთვის შემუშავდა ექსპერტების რჩევებზე დაყრდნობით.

ფოტო: alamy.com

რეგულაციების პირველი ვერსია უკვე მომზადებულია და ძალაში, შესაძლოა, მომავალი წლის დასაწყისში შევიდეს. ამ შემთხვევაში გერმანიის ცალკეული მიწების მთავრობებს დაევალებათ ახალი კანონების აღსრულების უზრუნველყოფა.

ქვეყნის სოფლის მეურნეობის სამინისტროს სპიკერის განცხადებით, ნაკლებსავარაუდოა, ძაღლის პატრონებს პოლიცია ეწვიოს იმის შესამოწმებლად, ჰყავდათ თუ არა მათი ოთხფეხა მეგობარი სასეირნოდ წაყვანილი. თუმცა განსაკუთრებული ყურადღება მიექცევა, როგორ ექცევიან ძაღლებს საშენებში.

აიკრძალება ასევე ძაღლებისთვის კუდის და ყურების ცხოველთა დაცვის წესების დარღვევით მოკვეთა. აიკრძალება იმ ძაღლების შეჯიბრებაზე გამოყვანაც, რომელთა ქცევაც "სახეობისთვის შეუფერებელია".

კლიოკნერის გეგმა მოიაზრებს ძაღლის ტრანსპორტირების წესებსაც, რის მიხედვითაც ცხოველმა ოთხსაათნახევარზე მეტი არ უნდა გაატაროს გზაში.