საქართველოს ბანკი ბიზნესის მხარდაჭერის კვალდაკვალ ახალი პროექტების დაფინასებას აგრძელებს. ბანკის ფინანსური მხარდაჭერით და აწარმოე საქართველოში პროგრამის ხელშეწყობით შპს კაია-მ ახალი დანადგარები შეიძინა და ახალი საწარმოო ხაზის გახსნის გადაწყვეტილება მიიღო. ამით კომპანიამ მნიშვნელოვანი წვლილი შეიტანა ქართული მძიმე მრეწველობის განვითარებაში.

კომპანია 2011 წლიდან ოპერირებს ბაზარზე და აწარმოებს ლითონის სახარჯ მასალებსა და ნაწილებს. მის წარმოებაში არსებული ლითონის მასალები ფართოდ გამოიყენება როგორც სამრეწველო, ისე საყოფაცხოვრებო მიმართულებით. კომპანია მრავალპროფილურია და ის, წარმოების გარდა, საინჟინრო და სავენტილაციო გაყვანილობებსაც ამონტაჟებს.

კაია-ს ბრენდის პროდუქცია საერთაშორისო სტანდარტების შესაბამისია. ის, საკუთარი საჭიროების გარდა, პროდუქციას სარეალიზაციოდ აწარმოებს და იმპორტირებულ ნაწარმს უწევს კონკურენციას. ბიზნესის განვითარების ეტაპზე, უკვე არსებული დაფინანსების გარდა, კომპანიას გაუჩნდა საჭიროება, საწარმოო ხაზის გაფართოებისთვის ახალი დანადგარები შეეძინა, რისთვისაც საქართველოს ბანკმა ფინანსური მხარდაჭერის მზაობა გამოიჩინა.

პანდემიით გამოწვეული კრიზისის მიუხედავად, საქართველოს ბანკისა და შპს კაია-ს პარტნიორობის შედეგად შიდა წარმოების ზრდას შეეწყობა ხელი. საწარმოში ამჟამად ჯამში 60 ადამიანია დასაქმებული. პროექტის საინვესტიციო მოცულობა 1 345 000 ლარია.

"მოხარული ვართ რომ გვაქვს შესაძლებლობა, წვლილი შევიტანოთ ეროვნულ საქმეში, რასაც ქართული მძიმე მრეწველობის წახალისება და ხელშეწყობა ჰქვია. სასიამოვნოა, რომ ეს ჩვენი და შპს კაია-ს უკვე მეორე წარმატებული ერთობლივი პროექტია. მნიშვნელოვანია, რომ კომპანია მიზნად ისახავს ადგილობრივი წარმოების ხელშეწყობას და მუდმივად ზრუნავს განვითარებაზე. მიგვაჩნია, რომ კომპანიები, რომლებიც ორიენტირებულები არიან წინსვლაზე და არ ჩერდებიან, ნამდვილად შეძლებენ წარმატების მიღწევას. ბანკში გვჯერა, რომ თუკი ხელს შევუწყობთ ასეთ ბიზნესებს, ჩვენ ერთად შევძლებთ წარმატებეული ეკონომიკის მშენებლობას", — განაცხადა საქართველოს ბანკის მცირე და საშუალო ბიზნესის მიმართულების ხელმძღვანელმა ზურაბ მასურაშვილმა.