ეგვიპტელი გამომძიებლებმა პარიზი-კაიროს მიმართულებით მიმავალ EgyptAir-ში, რომელიც 19 მაისს ხმელთაშუა ზღვაში ჩამოვარდა, ასაფეთქებელი ნივთიერება TNT–ის კვალი იპოვეს. ამის შესახებ BBC წერს.

აღნიშნული გარემოება შესაძლოა გახდეს თვითმფრინავის ჩამოგდებაზე სისხლის სამართლის საქმის გამოძიების დაწყების საფუძველი. ამ ავიაკატასტროფას ბორტზე მყოფი 66 ადამიანი ემსხვერპლა, რომელთა შორის 15 საფრანგეთის მოქალაქე იყო. სწორედ ამიტომ, გამოძიებას საფრანგეთიც ატარებს.

ფრანგმა გამომძიებლებმა BBC-ის განუცხადეს, რომ მათ ეჭვი ეპარებათ ეგვიპტელი გამომძიებლების აღმოჩენაში. მათი თქმით, ფრანგულ მხარეს ეგვიპტის ხელისუფლებასთან გარკვეული "სირთულეები" ჰქონდა. ფრანგული მხარის უმთავრესი წუხილი ეხებოდა საფრანგეთის მოქალაქეთა სხეულის ნაწილების ქვეყანაში დაბრუნებას.

საფრანგეთის საგარეო საქმეთა მინისტრმა კი განაცხადა, რომ ეგვიპტის ხელისუფლებამ ფრანგულ მხარეს კატასტროფის პირველივე დღიდან არ მისცა საშუალება, ჩართულიყო ავიაკატასტროფის გამოძიებაში.

EgyptAir-ის სამგზავრო თვითმფრინავი Airbus a320-ს, რომელიც პარიზი-კაიროს მიმართულებით გადაადგილდებოდა, დაშვებამდე 20 წუთით ადრე, ხმელთაშუა ზღვის თავზე გაუჩინარდა. ბორტზე 66 ადამიანი იყო, საიდანაც ყველა გარდაიცვალა.

თვითმფრინავის ნამსხვრევები მოგვიანებით ზღვაში იპოვეს. მიუხედავად რამდენიმეთვიანი გამოძიებისა, ავაიაკატასტროფის ზუსტი მიზეზი ჯერ დადგენილი არ არის. ერთადერთი, რაც ამ დროისათვისაა ცნობილი არის ის, რომ თვითმფრინავში, ჩამოვარდნამდე, დაფიქსირდა ტემპერატურის უჩვეულო მატება, რაც აჩენს ეჭვს ბორტზე ხანძრის არსებობის შესახებ. მნიშვნელოვანია ის გარემოებაც, რომ პილოტებს ავიადისპეჩერებთან არ გაუგზავნიათ განგაშის სიგნალი რაიმე პრობლემის შესახებ. ეს ფაქტი კი მიუთითებს ჩამოვარდნამდე მოვლენების უსწრაფესად განვითარებაზე.