გიორგი შაქარაშვილის საქმეზე დაკავებული 6 არასრულწლოვანის საქმის არსებითი განხილვა დაიწყო. პროცესი მცხეთის რაიონულ სასამართლოში ამ წუთებში მიმდინარეობს.

საქმის პროკურორის, ნანა გუგუტიშვილის განცხადებით, ბრალდების მხარე დააყენებს შუამდგომლობას დამატებითი მტკიცებულებების წარდგენის შესახებ.

"მივუთითებთ იმ ძირითად მტკიცებულებებს, რასაც გამოიკვლევს ბრალდების მხარე სასამართლოში და რაზე დაყრდნობითაც ბრალდების მხარეს აქვს გონივრული მოლოდინი, რომ ეს მტკიცებულებები გამოიტანს გამამტყუნებელ განაჩენს", — აცხადებს იგი.

პროკურორის თქმით, ბრალდების მხარე აღნიშნულ საქმეზე წარადგენს შაქარაშვილის ცხედარზე ჩატარებულ დამატებითი ექსპერტიზის პასუხებსა და სხვა მტკიცებულებებს, მათ შორის, ვიდეო მასალას.

"ამ ვიდეო მასალაზე დაფიქსირებულია ბრალდებულების გადაადგილება თბილისიდან მცხეთის მიმართულებით და უკან", — აღნიშნავს პროკურორი.

შაქარაშვილის საქმეზე დაკავებული 6 არასრულწლოვნის საქმე გამოძიებამ ცალკე გამოყო. მათგან ოთხს — ნ.ც-ს; ლ.შ-ს; ნ.ქ-ს და გ.მ-ს გამოძიება ედავება ჯგუფური ძალადობის ორგანიზებას, ძალადობაში მონაწილეობასა და თავისუფლების უკანონო აღკვეთას. ხოლო მათგან ორს — ზ.ხ-ს და ა.ქ-ს გარდა ამ მუხლებისა, გამოძიება ედავება განზრახ ჯგუფურად ჩადენილ მკვლელობას.

პროკურატურამ შაქარაშვილის საქმეზე ბრალდებულ ხუთ ადამიანს ბრალი დაუმძიმა. ვახტანგ ჩიქოვანს, ნიკოლოზ რევაზიშვილს, არჩილ გაგნიძესა და არასრულწლოვნებს: ზ.ხ.-და და ა.ქ.-ს გამოძიება დამამძიმებელ გარემოებებში განზრახ მკვლელობას ედავება. კერძოდ, პროკურატურა ამბობს, რომ მათ გიორგი შაქარაშვილი სცემეს და შემდეგ მდინარეში გადააგდეს, რა დროსაც ის გარდაიცვალა.