რამდენიმე დღის წინ Facebook-ის მომხმარებელმა სამერ უოლსერ უილიამსმა დაწერა პოსტი იმის შესახებ, რომ აშშ-ში, ჩრდილოეთ კაროლინაში, ღამით ის და მისი ქმარი ხმაურიანმა მნახველმა გააღვიძა. ეს დათვის პატარა ბელი იყო.

"ჩვენი საძინებლის ფანჯრის გარედან რაღაც ჩხაკუნი მოგვესმა, სახლის წინა ტერასიდან შემოდიოდა. შუქი რომ ავანთე, კართან დათვის ბელი იყო", — თქვა ულიამსმა The Dodo-სთან ინტერვიუში.

უილიამსი და მისი ქმარი თვალებს ვერ უჯერებდნენ: ცნობისმოყვარე დათუნია ორ ფეხზე იდგა და მათ ფანჯარაში იცქირებოდა. წყვილი არ გაბრაზებულა, პირიქით — მისი დანახვა ცოლ-ქმარს ძალიან გაუხარდა. მაგრამ, აი, ოინბაზი ბელის დედა სულ სხვა აზრზე იყო — მან თავისი მოუსვენარი შვილი ხალხის პირადი სივრცის დარღვევისთვის დატუქსა და ქეჩოში წავლებით წაათრია.

უილიამსი თვითონაც ორი შვილის დედაა და დედა დათვის ასეთი რეაქცია რომ ნახა, მისი ძალიან კარგად გაიგო.

"ძალიან კარგად მესმის. ჩემს შვილებთანაც ყოველდღიურად ასე მიწევს მოქცევა. მგონია, სწორედ ამიტომაა ეს ვიდეო ასეთი მაგარი. ის გვიჩვენებს, რომ შვილის აღზრდის ზოგიერთი ასპექტი ყველა სახეობისთვის ერთნაირია", — თქვა ულიამსმა.

უილიამსის აზრით, იმას თუ წარმოვიდგენთ, დედა დათვი ამ დროს თავის ბელს რას ეუბნებოდა, დაახლოებით ასეთი რამე იქნებოდა: "უკვე ასჯერ მაინც გითხარი, ხალხს ნუ აწუხებ-მეთქი!".

როგორც ჩანს, პატარა დათუნიამ თავისი გაკვეთილი ისწავლა, რადგან დათვები მალევე გაუჩინარდნენ სიბნელეში, უილიამსსა და მის ქმარს კი დაუვიწყარი სანახაობა და მოგონება დაუტოვეს, რომელსაც საშვილიშვილოდ მოყვებიან.

"ასეთი ვიზიტები იმის შემახსენებელია, რომ ჩვენ ისეთივე სტუმრები ვართ მათ სახლში, როგორც ისინი — ჩვენსაში", — დაამატა უილიამსმა.