შაქარაშვილის საქმეზე ბრალდებული მორაგბის, არჩილ გაგნიძის ადვოკატები მცხეთაში დამოუკიდებელ საგამოძიებო ექსპერიმენტს გეგმავენ. მათი კითხვები აქვთ იმ დროსთან დაკავშირებით, რაც საავტომობილო გზიდან გაქცევაში, გიორგი შაქარაშვილის შესაძლო ცემასა და მის წყალში გადაგდებას დასჭირდებოდა.

"ხვალ ვაპირებთ, რომ ჩავატაროთ საგამოძიებო ექსპერიმენტი დროსთან დაკავშირებით, რამდენად რეალურია კონკრეტულ დროში განხორციელდეს ის ფაქტობრივი გარემოებები, რაც პროკურატურას მითითებული აქვს მკვლელობის ნაწილში. ასევე, ჩავატარებთ ექსპერიმენტს ფოტოგრაფი იაკობ ბრეგვაძის ჩვენებასთან დაკავშირებით. იგი ამბობს, რომ დაინახა ორი პირი, რომელიც გარბოდა. ასევე, ჩავატარებთ საგამოძიებო მოქმედებებს გურამ ამირხანაშვილის ჩვენებასთან დაკავშირებითაც, რომელმაც კიდევ ერთხელ შეცვალა ჩვენება და განაცხადა, რომ იძულებით ჩასვეს მანქანაში. გადავამოწმებთ რელიეფს, თუ რამდენად შესაძლებელი იყო იქ ჩასვლა, ადამიანის მოკვლა და უკუნით სიბნელეში უკან ამოსვლა. ჩვენთან ერთად, საგამოძიებო ექსპერიმენტში თავისივე სურვილისამებრ რამდენიმე პიროვნება მიიღებს მონაწილეობას, ეს პირები საქმეში არ ფიგურირებენ, თუმცა ფლობენ გარკვეულ ინფორმაციას. არ გამოვრიცხავ და სავალდებულოც იქნება, რომ ეს პირები საგამოძიებო მოქმედების ჩატარების შემდეგ გამოკითხონ ", — აღნიშნა ალექსანდრე კობაიძემ.

19 წლის ახალგაზრდა ფეხბურთელის, გიორგი შაქარაშვილის ცხედარი ოთხდღიანი ძებნის შემდეგ, მდინარე არაგვში იპოვეს. ბიჭისდაკარგვის შესახებ ოჯახმა პოლიციას 19 ივნისს, 11 საათისთვის შეატყობინა. ისინი იმედოვნებდნენ, რომ გიორგი იმალებოდა და ოჯახს მალე დაუბრუნდებოდა.

გიორგი შაქარაშვილის გარდაცვალებასთან დაკავშირებით არაერთი ვერსია გაჟღერდა, რომელთა ნამდვილობა გამოძიებამ უნდა დაადგინოს. რაც ვიცით, ისაა, რომ მის გაუჩინარებას წინ დაპირისპირება უძღოდა.

თავდაპირველად გამოძიება თავისუფლების უკანონოდ აღკვეთის ფაქტზე დაიწყო. შს მინისტრის მოადგილის, ვლადიმერ ბორცვაძის განმარტებით, მას შემდეგ, რაც ფიზიკური დაპირისპირების ფაქტი გამოიკვეთა, კვალიფიკაციას კიდევ ერთი — ძალადობის მუხლი დაემატა.

18-19 ივნისს მცხეთის მუნიციპალიტეტის სოფელ ნარეკვავის დასახლებაში, დაქირავებულ სახლში გიორგი შაქარაშვილი რამდენიმე პირთან ერთად დაბადების დღეზე იყო. წვეულებაზე შეკრებილებიდან ნაწილი ერთმანეთს იცნობდა, ნაწილი — არა.

როგორც ცნობილია, ახალგაზრდებს შორის იყო ფიზიკური და სიტყვიერი დაპირისპირება, თუმცა რა გახდა ამის მიზეზი, გამოძიება არ საუბრობს. მათი ვერსიით, დაპირისპირებაში შაქარაშვილის მონაწილეობა არ იკვეთება.

ფეხბურთელის ახლობლების ამბობენ, რომ დაპირისპირების შემდეგ გიორგი შაქარაშვილმა რამდენიმე პირთან ერთად სახლი დატოვა და ავტობანზე ტაქსის გასაჩერებლად და თბილისში დასაბრუნებლად გავიდა.

შინაგან საქმეთა სამინისტროს გამოძიების ინფორმაციით, კონფლიქტი თბილისი-სენაკი-ლესელიძის საავტომობილო გზაზე, მდინარე არაგვზე ხიდის სიახლოვესაც გაგრძელდა, რის შემდგომაც შაქარაშვილის კვალი იკარგება.

შინაგან საქმეთა სამინისტრომ გიორგი შაქარაშვილის საქმეზე 26 ივნისს 17 პირი დააკავა. უწყება არ გამორიცხავს, რომ დაკავებულ პირთა სია კიდევ გაიზარდოს, თუმცა გარდაცვალების მიზეზი ამ დრომდე უცნობი რჩება