საქართველოს პარლამენტმა ქვეყნის 2017 წლის ბიუჯეტი 102 ხმით დაამტკიცა 10–ის წინააღმდეგ. ოპოზიცია ქვეყნის მთავარ ფინანსურ დოკუმენტს მხარს არ უჭერს და ამბობს, რომ ეს არის "გაღარიბების ბიუჯეტი".

2017 წლის ბიუჯეტის ასიგნებები 11 415 500 000 ლარით განისაზღვრა, საიდანაც 10 338 333 000 ლარი საბიუჯეტო სახსრებია, 154 500 000 – გრანტები, 922 700 000 – კრედიტები.

2017 წლის ბიუჯეტში დაგეგმილია თამბაქოს ნაწარმზე აქციზის გაზრდა ფილტრიან სიგარეტზე 60 თეთრით, ხოლო უფილტრო – 30 თეთრით. ასევე იზრდება გადასახადი ნავთობის პროდუქტებზე, წესდება ავტომობილის გადასახადი იმ პირებისთვის, რომელთა შემოსავალი წელიწადში 40 ათას ლარს აჭარბებს, გარდა ამისა, ძვირდება მარჯვენასაჭიანი ავტომობილების განბაჟება.

ხელისუფლება აღნიშნული გადასახადების გაზრდით ცდილობს მიიღოს დამატებითი შემოსავალი ბიუჯეტში, რადგან 2017 წლიდან უქმდება მოგების გადასახადი იმ შემთხვევაში, თუ კომპანია აღნიშნულ თანხას ისევ ბიზნესში დააბანდებს.