იმერეთში, ხარაგაულის რაიონის სოფელ ხუნევთან განსაკუთრებით დიდი ოდენობით ნარკოტიკული საშუალების უკანონო შეძენა-შენახვის ბრალდებით ერთი ადამიანი დააკავეს. ამის შესახებ ინფორმაციას შინაგან საქმეთა სამინისტრო ავრცელებს.

შსს ინფორმაციით, დაკავებულის ავტომობილისა და პირადი ჩხრეკისას ნივთმტკიცებად 48 შეკვრა დაფასოებული, ჰეროინის შემცველი ნარკოტიკული საშუალება ამოიღეს.

უწყების ცნობით, გამოძიება საქართველოს სისხლის სამართლის კოდექსის 260-ე მუხლის მე-6 ნაწილის ა ქვეპუნქტით მიმდინარეობს, რაც განსაკუთრებით დიდი ოდენობით ნარკოტიკული საშუალების უკანონო შეძენა-შენახვას გულისხმობს და 8-დან 20 წლამდე, ან უვადო თავისუფლების აღკვეთას ითვალისწინებს.