ამაზონის ტყეში აგვისტოს თვის პირველ 10 დღეში 10 136 ხანძარი დაფიქსირდა. The Guardian-ის ინფორმაციით, ბოლო 10 წლის მანძილზე ეს ბრაზილიაში ყველაზე ძლიერი ხანძრის სეზონია. წინა წელთან შედარებით, ხანძართა რაოდენობის მაჩვენებელი 17 პროცენტით არის გაზრდილი.

საერთაშორისო საზოგადოებრივი ბუნებისდამცველი ორგანიზაციის ინფორმაციით, 2010 წლის შემდეგ, აგვისტოს დასაწყისში დაფიქსირებული ხანძრების რაოდენობის მხრივ, ეს ყველაზე მაღალი მაჩვენებელია. 2010 წელს, ხანძართა რაოდენობა 11 280 იყო. მათივე ინფორმაციით, ხანძართა რაოდენობა გაზრდილი იყო ივლისის თვეშიც და მან ჯამში 6 803 შეადგინა, რაც 2019 წლის მონაცემებს 28%-ით აღემატება.

უცხოური მედიის ინფორმაციით, ექსპერტები ხანძრების გახშირებას, მეტწილად, მთავრობის მიერ გარემოსდაცვითი პოლიტიკის არარსებობას უკავშირებენ. მათი ცნობით, ბრაზილიის პრეზიდენტი, ჟაირ ბოლსონარუ ხანძრების პრობლემას არ აღიარებს და აცხადებს, რომ სტატისტიკა გაზრდილი ხანძრების შესახებ სიმართლეს არ შეესაბამება.