ევროკომისიის პრეზიდენტი, ურსულა ფონ დერ ლეიენი ტვიტერზე წერს, ევროკომისია გადახედავს ბელარუსთან ურთიერთობის საკითხს და შესაბამის ზომებს მიიღებს.

ურსულა ფონ დერ ლეიენის თქმით, ბელარუსიის საპრეზიდენტო არჩევნები არ იყო თავისუფალი და სამართლიანი, სახელმწიფოს მხრიდან ძალადობა და ადამიანის უფლებების შელახვა კი დაუშვებელია.

"ბელარუსიის საპრეზიდენტო არჩევნები არ ყოფილა თავისუფალი და სამართლიანი. სახელმწიფოს მხრიდან ძალადობა და ადამიანის უფლებების, თავისუფლების შელახვა დაუშვებელია. ევროკომისია ბელარუსთან ურთიერთობის საკითხს გადახედავს და პასუხისმგებელი პირების მიმართ შესაბამის ზომებს მიიღებს", — წერს ურსულა ფონ დერ ლეიენი ტვიტერზე.

9 აგვისტოს ბელარუსში საპროტესტო გამოსვლები საპრეზიდენტო არჩევნებს მოყვა. გამოსვლები გვიან ღამით მას შემდეგ დაიწყო, რაც წინასწარი დათვლის შედეგად ცნობილი გახდა, რომ ხმების უმრავლესობა ალექსანდრ ლუკაშენკომ მიიღო.

მოქალაქეებსა და პოლიციას შორის იყო შეტაკებები. სამართალდამცავებმა წყლის ჭავლი და რეზინის ტყვიები გამოიყენეს.

ლუკაშენკოს მთავარი ოპონენტი სვეტლანა ტიხანოვსკაია აცხადებდა, რომ ქვეყნის დატოვებას არ აპირებდა და არჩევნების შედეგების განულებისთვის იბრძოლებდა. თუმცა მოულოდელად, 11 აგვისტოს ცნობილი გახდა, რომ მან ქვეყანა დატოვა და ლიეტუვაში იმყოფება.

გამგზავრებამდე ის ბელარუსის ცესკოში რამდენიმე საათის განმავლობაში იმყოფებოდა. ინტერნეტში გავრცელდა მისი ვიდეომიმართვაც, სადაც ის დემონსტრანტებს მოუწოდებს, ქუჩაში აღარ გავიდნენ. როგორც ვარაუდობენ, აღნიშნული მიმართვა მან ზეწოლის ქვეშ ჩაწერა და დადგმულია.