სლოვაკეთი ზელიმხან ხანგოშვილი საქმესთან დაკავშირებით რუსეთის საელჩოს სამ თანამშრომელს აძევებს. მათ ქვეყანა 13 აგვისტომდე უნდა დატოვონ. ამის შესახებ ინფორმაციას BBC ავრცელებს და ადგილობრივ მედიაზე დაყრდნობით ამბობს, რომ საელჩოს თანამშრომლების ქვეყნიდან გაძევება, სავარაუდოდ, გასულ წელს ბერლინში საქართველოს მოქალაქის, ზელიმხან ხანგოშვილის მკვლელობას უკავშირდება. მათივე ინფორმაციით, სლოვაკეთის მთავრობა სამი პირის ქვეყნიდან გაძევების მიზეზად ვიზების ბოროტად გამოყენებას ასახელებს.

BBC წერს, რომ სლოვაკეთის საგარეო საქმეთა მინისტრის პრეს-სპიკერის თქმით, საელჩოს თანამშრომლების საქმიანობა დიპლომატიური ურთიერთობის შესახებ ვენის კონვენციას ეწინააღმდეგებოდა და ამბობს:

"გარდა ამისა, მოხდა სანკტ-პეტერბურგში სლოვაკეთის საელჩოს მიერ გაცემული ვიზების ბოროტად გამოყენება, რაც ნატოსა და ევროკავშირის წევრი ქვეყნის ტერიტორიაზე მომხდარ სერიოზულ დანაშაულს უკავშირდება" — განაცხადა პრეს-სპიკერმა.

BBC-ის ინფორმაციით, ადგილობრივი მედია წერს, რომ ხანგოშვილის მკვლელობის დაგეგმვაში ეჭვმიტანილი ერთ-ერთი პირი ევროკავშირში სლოვაკეთის ვიზით გადაადგილდებოდა.

ზელიმხან ხანგოშვილი გერმანიაში 2019 წლის 23 აგვისტოს მოკლეს. მალევე მის მკვლელობაში ბრალდებული დააკავეს, რომელიც რუსეთის მოქალაქე აღმოჩნდა.

გერმანიის პროკურატურის განცხადებაში მკვლელობაში ბრალდებულის გვარს არ ამბობენ და მხოლოდ ვადიმ კ.-თი მოიხსენიებენ. 2019 წლის დეკემბერში Bellingcat-მა გამოაქვეყნა ჟურნალისტური გამოძიება, რომლის თანახმად, ხანგოშვილის მკვლელობაში ბრალდებულს ვადიმ კრასიკოვი ჰქვია, ხოლო გერმანიაში ის ვადიმ სოკოლოვის სახელზე გაცემული პასპორტით ჩავიდა.

როგორც გერმანიის საგამოძიებო უწყების ტექსტშია აღნიშნული, 23 აგვისტოს ბერლინის ერთ-ერთ პარკში ვადიმ კრასიკოვი ზელიმხან ხანგოშვილს ველოსიპედით უკნიდან მიუახლოვდა და Glock 26-ის ტიპის იარაღიდან ესროლა.

რუსეთის ხელისუფლება ხანგოშვილის ლიკვიდაციაში თანამონაწილეობას უარყოფს. ამასთან, რუსეთის პრეზიდენტი, ვლადიმერ პუტინი მას "ბოევიკს" უწოდებდა და ამბობდა, რომ მოსკოვის მეტროს აფეთქებაში იყო დამნაშავე. მისივე თქმით, რუსეთი გერმანიისგან ხანგოშვილის გადაცემას მოითხოვდა. გერმანია კი ამას უარყოფდა და რუსეთს მკვლელობის ბრძანებაში ადანაშაულებდა.