ევროპული საქართველოს დეპუტატი, ირმა ნადირაშვილი აცხადებს, რომ 8 აგვისტოს ახალქალაქში მომხდარი დაპირისპირება სახელმწიფომ ვერ შეაჩერა და არეულობა ვერ აღკვეთა. დეპუტატის თქმით, ეს იმაზე მიუთითებს, რომ "სახელმწიფოს მთლიანად ხელიდან აქვს გაქცეული კრიმინალის მართვა". ირმა ნადირაშვილმა ამის შესახებ დღეს გამართულ ბრიფინგზე ისაუბრა.

"ჩვენ გვქონდა ვითარება, როდესაც გადაწვეს სახლები, სასტუმროები. გვქონდა ვითარება, როდესაც სახელმწიფომ ვერ შეაჩერა ეს კონფლიქტი, ვერ დადგა თავის დონეზე და ვერ აღკვეთა ის არეულობა, რომელიც გრძელდებოდა მთელი გუშინდელი დღის განმავლობაში და განვლილი ღამის განმავლობაში. ეს ნიშნავს, რომ ახალქალაქის სურათი არის გაგრძელება მთელი იმ ვითარების, რომელიც გვაქვს საქართველოში, როდესაც სახელმწიფოს მთლიანად ხელიდან აქვს გაქცეული კრიმინალის მართვა, როდესაც კრიმინალები გრძნობენ, რომ თვითონ არიან ამ ქვეყნის ბატონ-პატრონი და მმართველი", — აცხადებს ირმა ნადირაშვილი.

მისივე თქმით, ძალადობრივი გარემო ქვეყანაში ბიძინა ივანიშვილმა შექმნა. ქართული ოცნების ლიდერი დეპუტატმა "შავ სამყაროსთან" ურთიერთობაში დაადანაშაულა, რასაც, მისი თქმით, ივანიშვილი პოლიტიკური ოპონენტებისთვის ანგარიშის გასასწორებლად იყენებს.

"ზოგადად, ძალადობრივი გარემო ამ ქვეყანაში შექმნა ბიძინა ივანიშვილმა. როდესაც პარლამენტის უმაღლესი სანანონმდებლო ორგანოს წევრი ქართული ოცნებიდან დარბის ახალქალაქში და იარაღით ჩნდება საზოგადოების წინაშე, შემდეგ მას არ უჩერებენ უფლებამოსილებას, არ მიდის ციხეში, ეს არის სწორედ ძალადობის წახალისება. გუშინდელი ვითარება არის შედეგი სწორედ ამ ძალადობრივი ქმედებებისა სახელმწიფოს მხრიდან", — განაცხადა ირმა ნადირაშვილმა.

ახალქალაქში, სადაც გუშინ დაპირისპირება იყო, ამ დროისთვის სიმშვიდეა. ადგილზე პოლიცია კვლავ რჩება.

უკვე დაკავებულია ერთი პირი, რომელსაც ახალქალაქში მომხდარი დაპირისპირებისას განზრახ მკვლელობა ედება ბრალად. შსს-ში ამბობენ, რომ ჯგუფური ძალადობის ორგანიზებასა და მასში მონაწილეობის ფაქტზე გამოძიება გრძელდება.

jnews-ის ინფორმაციით, გუშინ, 8 აგვისტოს, დაახლოებით 19:00 საათზე ახალქალაქში ადამიანთა ჯგუფმა დაიწყო დარბევები, ამტვრევდნენ სასტუმროს კარებსა და ფანჯრებს, რის შემდეგაც იქ ხანძარი გაჩნდა. ადგილზე გარდაიცვალა ერთი ადამიანი, ერთი საავადმყოფოშია რამდენიმე. გამოცემის ინფორმაციით, დაპირისპირება სოფელ კულიკამში ახალგაზრდა კაცის მკვლელობას მოჰყვა. jnews-მა გაავრცელა ვიდეო, სადაც ჩანს ხალხმრავლობა, ისმის მტვრევის ხმა. ჟურნალისტი ჰყვება, რომ იყო სროლაც.

მოგვიანებით სამცხე-ჯავახეთის გუბერნატორმა დაადასტურა, რომ დარბევები მკვლელობას მოჰყვა.

არსებული ინფორმაციით, გადამწვარია 4 სახლი და ერთი სასტუმრო, ასევე, მანქანები. jnews წერს, რომ უძრავი ქონება ერთი და იგივე ადამიანის სახელს უკავშირდება და ის შურისძიების მიზნით დააზიანეს.