გამოცემა Jnews-ის ინფორმაციით, ახალქალქში მოქალაქეთა ჯგუფმა ჯამში 4 სახლი დაწვა. გამოცემა ამბობს, რომ ყველა ეს სახლი სასტუმრო "არტსეკის" მფლობელს უკავშირდება, რომლის შენობაც პირველი დაწვეს.

On.ge-ს კვლავ ცდილობს ადგილიდან მეტი ინფორმაციის მოპოვებას. შინაგან საქმეთა სამინისტროში არ აზუსტებენ, შესულია თუ არა ახალქალაქში სპეცრაზმი, ამბობენ მხოლოდ იმას, რომ ადგილზე მობილიზებულია პოლიცია.

არსებული ინფორმაციით, გარკვეული პერიოდის განმავლობაში ქუჩაში სიმშვიდე იყო, შემდეგ კი ვითარება კვლავ დაიძაბა.

ფოტო: jnews.ge

ფოტო: jnews.ge

ამ დრომდე უცნობია, რას უკავშირდება დაპირისპირება. გამოცემა jnews.ge ავრცელებს ვიდეოს, სადაც ჩანს ხალხმრავლობა, ისმის მტვრევის ხმა. ჟურნალისტი ჰყვება, რომ იყო სროლაც, მოკლულია ერთი ადამიანი, ერთი კი საავადმყოფოშია გადაყვანილი.

jnews წერს, რომ ახალგაზრდების ჯგუფმა სასტუმროს კარები და ფანჯრების ჩაამტვრია, რის შემდეგაც ცეცხლი გაჩნდა. ჟურნალისტი ვარაუდობს, რომ დაპირისპირება მანამდე მომხდარმა მკვლელობამ გამოიწვია.

"ჩვენთან საავადმყოფოში შემოიყვანეს ერთი გარდაცვლილი, 27 წლის ბიჭი, რომელსაც ცეცხლსასროლი იარაღით გულის არეში ჰქონდა ჭრილობა მიყენებული, როცა ჯგუფი მივიდა უკვე გარდაცვლილი იყო. მეორე ახალგაზრდა ბიჭს მსუბუქი დაზიანება ჰქონდა. ქირურგმა ნახა მცირე დაზიანება იყო ხერხემლის არეში და უკვე გაეწერა ჩვენგან", — აცხადებს ახალქალაქის საავადმყოფოს მენეჯერი "სამხრეთის კარიბჭესთან".

On.ge დაუკავშირდა საქართველოს შინაგან საქმეთა სამინისტროს, სადაც დეტალებზე არ საუბრობენ. უწყებაში ადასტურებენ ერთი ადამიანის მკვლელობას, თუმცა არ აზუსტებენ, ეს მოხდა დაპირისპირებამდე, რაც შესაძლოა გამხდარიყო ჩხუბის მიზეზი თუ ადამიანი დაიღუპა დაპირისპირებისას. შსს-ს ინფორმაციით, გამოძიება სისხლის სამართლის კოდექსის 108-ე მუხლისა და 236 მუხლის მე-3 და მე-4 პუნქტებით მიმდინარეობს, რაც განზრას მკვლელობასა და ცეცხლსასროლი იარაღის მართლსაწინააღმდეგო შეძენა, შენახვასა და ტარებას გულისხმობს.