ქართული ოცნების დეპუტატის, მამუკა მდინარაძის განცხადებით, ოკუპაცია "ღალატის ტოლფასი საქციელის" შედეგია. ამის შესახებ მან ტელეკომპანია იმედის ეთერში ისაუბრა.

"ჩვენ რისკიან გზაზე არ დავდივართ. რისკიან გზაზე იარეს ქართველებმა, 2012 წლამდე. ამ გზას მოჰყვა პროვოკაციაზე წამოგება, შემდეგ საკუთარი თავის და საკუთარი ქვეყნის დადანაშაულება და აბსოლუტურად გადაჭარბების გარეშე, არ მინდა რომ ეს სიტყვა გამოვიყენო, მაგრამ იყო ღალატის ტოლფასი. ამ ღალატის ტოლფასი საქციელით ჩვენ მივიღეთ ის, რაც მივიღეთ — ჩვენ ტერიტორიების 20% არის დაკარგული", — აცხადებს მდინარაძე.

მან კომენტარი გააკეთა ოპოზიციის ბრალდებაზეც, რის მიხედვითაც მუხათგვერდის ძმათა სასაფლაოზე 8 აგვისტოს მისვლა რუსული ნარატივის ნაწილია.

"ბოლო წლების განმავლობაში დაალაგეს ნარატივი, თითქოს ჩვენი გმირი პოლიციელების, ჯარისკაცების და უდანაშაულო მოქალაქეების საფლავზე გასვლაც კი რუსული ნარატივიაო, რადგან 8 აგვისტოს ხდება. ამით ჩვენს მოქალაქეებს აყენებენ უმძიმეს შეურაცხყოფას, ამით ეუბნებიან თქვენ გაქვთ მოკლე მეხსიერებაო, იმიტომ რომ 2018 თუ 2017 წლამდე ისინიც 8 აგვისტოს გადიოდნენ", — თქვა მდინარაძემ.