ერთიანი ნაციონალური მოძრაობის თავმჯდომარე, გრიგოლ ვაშაძე აცხადებს, რომ 2008 წელი საქართველოს ისტორიის ერთ-ერთი ყველაზე ტრაგიკული ფურცელია. ის პარტიის სხვა ლიდერებთან ერთ ძმათა სასაფლაოზე იმყოფებოდა.

"რუსეთის ფედერაციამ ჯერ სამხედრო-ტერორისტული ოპერაცია, შემდეგ კი სრულმასშტაბიანი სამხედრო აგრესია განახორციელა ჩვენი სამშობლოს წინააღმდეგ. 600-მდე ადამიანი დაგვეღუპა, უამრავი დასახიჩრდა და დაიჭრა. ამას არასდროს ვაპატიებთ. რუსეთის ფედერაციის მთავარი ინტერესი და მიზანი იყო საქართველოს ევროატლანტიკურ გზაზე დამუხრუჭება, ქვეყნის სუვერენული საგარეო პოლიტიკური კურსის გადამისამართება მოსკოვზე და ჩვენი სახელმწიფოებრიობის განადგურება" — აცხადებს ვაშაძე.

მან აღნიშნა ისიც, რომ თუკი საქართველოს სტრატეგიული პარტნიორები მიუნხენის სამიტზე პუტინის გამოსვლას ყურადღებით მოუსმენდნენ, არც საქართველო და არც უკრაინა ოკუპაციის პრობლემების წინაშე არ აღმოჩნდებოდნენ.

აგვისტოს ომის დაწყებიდან 12 წელი გავიდა. 2008 წლის აგვისტოში რუსეთი საქართველოს ტერიტორიაზე შემოიჭრა, ცეცხლი გაუხსნა ქართულ სოფლებს, დაიკავა როკის გვირაბი. საქართველომ რუსულ აგრესიას უპასუხა. ომში საქართველოს თავდაცვის სამინისტროს 170 მოსამსახურე, შინაგან საქმეთა სამინისტროს 14 თანამშრომელი და 224 სამოქალაქო პირი დაიღუპა.

ჯანდაცვის სამინისტროს მონაცემებით, დაჭრილ/დაშავებულ სამოქალაქო და სამხედრო პირთა რაოდენობა სულ 2 232 პირს შეადგენს. მათ შორის, 1045 სამხედრო მოსამსახურე იყო.

IDFI-ის ინფორმაციით, აგვისტოს ომის შემდეგ, საქართველოში 263 598-მდე გაიზარდა დევნილთა რაოდენობა. 2009-2015 წლებში კი, საცხოვრებელი ფართი საკუთრებაში გადაეცა ჯამში 18 679 ოჯახს.

2008 წლის 12 აგვისტოს ცეცხლის შეწყვეტის შეთანხმებით აღებული ვალდებულებების მიუხედავად, რუსეთი კვლავ აგრძელებს სუვერენული და დამოუკიდებელი სახელმწიფოს რეგიონების უკანონო ოკუპაციას, საერთაშორისო სამართლის უგულებელყოფით. საოკუპაციო ხაზთან კვლავ არსებობს საქართველოს მოქალაქეების გატაცებებისა და უკანონო დაკავებების ფაქტები. ასევე, საოკუპაციო ხაზის გასწვრივ განლაგებულია მავთულხლართები და ე.წ. საზღვრის აღმნიშვნელი ნიშნები.