კარანტინში ბევრი უჩვეულო გამოცდილების მოწმე გავხდით და მათ შორის ერთ-ერთი განსაკუთრებული ორი იტალიელი გოგოს სახალისო და შთამაგონებელი ვიდეო იყო, რომლებმაც ჩოგბურთის მატჩი მეზობელი შენობების სახურავებზე გამართეს.

ვიდეო მალევე ძალიან პოპულარული გახდა სოციალურ ქსელებში და მათ შესახებ არაერთმა გავლენიანმა საერთაშორისო გამოცემამაც კი დაწერა.

ყველას კარგად გვახსოვს, თუ როგორი მძიმე შედეგის მომტანი იყო პანდემია იტალიისთვის, თუმცა ამჟამად იქ ვითარება შედარებით სტაბილურადაა და ამ ცნობილი მოზარდი ჩოგბურთელების თამაშიც ნამდვილი სიურპრიზით დაგვირგვინდა — მათ როჯერ ფედერერი შეხვდა.

11 წლის კაროლა და 13 წლის ვიტორია ერთ ჩვეულებრივ ინტერვიუზე დაიბარეს, სადაც მათ ჩოგბურთის მიმართ თავიანთ დამოკიდებულებაზე უნდა ესაუბრათ და წარმოდგენა არ ჰქონდათ, რომ რამდენიმე წუთში მათი უდიდესი ოცნება ახდებოდა.

"მინდა, ფედერერივით დახვეწილი მოთამაშე ვიყო", — ამბობს კაროლა.

"მას რომ შევხვდე, ალბათ, ზედ შევახტები", — აღნიშნა ვიტორიამ.

სწორედ ამის შემდეგ გამოჩნდა 38 წლის შვეიცარიელი ჩოგბურთელი მათთან და თამაში სწორედ იმ შენობების სახურავზე შესთავაზა, სადაც თვეების წინ ამ მოზარდებს გაჰყავდათ კარანტინში დრო.

სახალისო მატჩის შემდეგ ფედერერმა ახალგაზრდა ჩოგბურთელები სადილზეც მიიწვია — რა თქმა უნდა, მათ იტალიური პასტა მიირთვეს.

"მრავალ საოცარ ადგილას მითამაშია, თუმცა ეს ნამდვილად განსაკუთრებული გამოცდილება იყო ჩემთვის. ჩვენ დავამტკიცეთ, რომ ყველგან შეგვიძლია ჩოგბურთის თამაში და ამით სიამოვნების მიღება. საუკეთესო დრო გავატარე", — ამბობს მსოფლიოს ლეგენდარული სპორტსმენი ვიდეოში.