ვენეციის კინოფესტივალმა თავის 2020 წლის ღონისძიებას ორი ფილმი შემატა: რეჯინა კინგის სრულმეტრაჟიანი სარეჟისორო დებიუტი One Night in Miami და პედრო ალმოდოვარის ინგლისურენოვანი დებიუტი The Human Voice. მათგან პირველი წინა კვირაში დაანონსდა ტორონტოს საერთაშორისო კინოფესტივალის ფილმების სიაში, თუმცა მეორე საკმაო სიურპრიზია, რადგან თავიანთ მოკლემეტრაჟიან ფილმზე მუშაობა ალმოდოვარმა და ტილდა სუინტონმა მხოლოდ წინა თვეში დაიწყეს.

ივლისში გადაღებების შემდეგ სექტემბერში მსოფლიო პრემიერის ქონა საკმაოდ შთამბეჭდავია. The Human Voice პირველი ფილმია ალმოდოვარის კანის გამარჯვებული Pain and Glory-ის შემდეგ, რომელიც წელს ოსკარზეც იყო ნომინირებული საუკეთესო უცხოენოვანი ფილმისთვის.

ვენეციის კინოფესტივალის ცნობით, ალმოდოვარის The Human Voice დაახლოებით 30-წუთიანი იქნება. ფესტივალი ფილმს შემდეგნაირად აღწერს:

ჟან კოქტოს თეატრალური წარმოდგენის საკმაოდ თავისუფალი ადაპტაცია, რომელზეც პედრო ალმოდოვარი ათწლეულების განმავლობაში ოცნებობდა. ის იმ სასოწარკვეთილი ქალის (სუინტონი) ამბავს მოგვითხრობს, რომელიც საყვარელმა ახლახან მიატოვა და მის ზარს ელოდება. ეს პედრო ალმოდოვარის გადაღებული პირველი ინგლისურენოვანი ფილმია.

"ძალიან მიხარია, რომ ვენეციაში ასეთ გამორჩეულ წელს მიწევს დაბრუნება, სადაც COVID-19 დაუპატიჟებელი სტუმარი იქნება. ყველაფერი სხვანაირი იქნება და ერთი სული მაქვს, როდის ვნახავ ამ ყოველივეს პირადად", — თქვა ალმოდოვარმა ვენეციის კინოფესტივალზე თავისი მოკლემეტრაჟიანი ფილმის დებიუტის დაანონსებისას.

"ჩემთვის პატივია, ტილდასთან ერთად ვიყო იმ წელს, როდესაც ის ძალიან დამსახურებულ ჯილდოს იღებს. მეტსაც გეტყვით: The Human Voice ტილდას დღესასწაულია, მისი ურიცხვი და მრავალფეროვანი სამსახიობო უნარების წარმოდგენა. მისი გადაღება ნამდვილი სანახაობა იყო", — დაამატა რეჟისორმა.

სუინტონი წელს ვენეციის კინოფესტივალზე უმაღლეს ჯილდოს, საპატიო ოქროს ლომს, იღებს — პრიზს, რომლის პატივიც 2019 წლის ფესტივალზე ალმოდოვარს ერგო. ქვემოთ კი იხილეთ The Human Voice-ის პირველი ფოტო:

ფოტო: Venice Film Festival