თბილისის მერის, მაია ბითაძის განცხადებით, ჭავჭავაძის გამზირზე ნაკადები დათვლილია, ამიტომაც "სექტემბრის არ ეშინიათ", როცა ქალაქში მოსახლეობა დაბრუნდება და სწავლა განახლდება.

მერის მოადგილემ რუსთავი 2-ის ეთერში შაბათს, პირველ აგვისტოს შექმნილ პრობლემაზე ისაუბრა, როცა მანქანებს განახლებულ გამზირზე საცობში ყოფნა საათების განმავლობაში უწევდათ. როგორც ბითაძე განმარტავს, ეს რამდენიმე ფაქტორით იყო გამოწვეული, მათ შორის, იმით, რომ მძღოლებმა გადაადგილების ახალი სქემა არ იცოდნენ.

"ყველა ნაკადი დათვლილია პიკის საათში და ორი წლის განმავლობაში თბილისში ითვლებოდა ნაკადები. პიკის საათში გათვალისწინებულია სამომავლო განაშენიანება, შესაბამისად შუქნიშნის ფაზები დათვლილია 20-პროცენტიანი მატებით. მარტივად რომ ვთქვათ, დღეს ჭავჭავაძე თავისუფალია, მათ შორის იმ ფაქტორიდან გამომდინარე, რომ ქალაქიდან ხალხი არის გასული, თუმცა ქალაქიდან ხალხი იყო გასული შაბათსაც. მაგრამ პრობლემა იყო დაკავშირებული იმასთან, რომ საგზაო მოძრაობის სქემები იყო მძღოლებისთვის იყო უცნობი. დღეს ეს პრობლემა გადაჭრილია. სექტემბრის ჩვენ არ გვეშინია იმიტომ, რომ ნაკადები დათვლილია", — განაცხადა მერის მოადგილე.

ამასთან, მაია ბითაძემ ჭავჭავაძის დაპროექტებასთან დაკავშირებულ კრიტიკას უპასუხა. მისი თქმით, სატრანსპორტო სქემა დეტალურადაა დათვლილი და ეს კვლევებზე დაყრდნობით გაკეთდა.

"ბოლო რამდენიმე დღის განმავლობაში ცოტა სიურრეალიზმის ჟანრიდან გვესმის გარკვეული შფოთვები. კიდევ ერთხელ მოვუწოდებ ყველა ექსპერტს, რომელიც არ ფლობს ინფორმაციას ან საერთოდ არ იცის, როგორ დგება სატრანსპორტო მოძრაობის თანამედროვე სქემები და როგორ ხდება დაპროექტება. ამ პროექტის განხორციელებაში ჩვენ გვეხმარებოდნენ არამხოლოდ უცხოელი ექსპერტები, არამედ მაღალკვალიფიციური ექსპერტები და ყველა საგზაო უსაფრთხოების საკითხი იქნა გათვალისწინებული", — აღნიშნა ბითაძემ.

რაც შეეხებათ ავტობუსების მიერ საპირისპირო მიმართულებით გადასვლას, მერის მოადგილის თქმით, ეს არანაირ საფრთხეს არ ქმნის:

"ავტობუსები ჭავჭავაძეზე გადაადგილდებიან საავტობუსო ზოლში და მათი მარშრუტის ხანგრძლივობა 25 წუთიდან 8 წუთამდე შემცირდა".

ჭავჭავაძის გამზირზე ახალი სატრანსპოორტო სქემა პირველ აგვისტოს ამოქმედდა. განახლებულ გამზირზე ცალკე გამოყოფილია ავტობუსების ზოლი, ასევე, ველობილი, ხოლო კერძო ავტომანქანებს გადასაადგილებლად ერთი ზოლი დარჩათ. სოციალურ ქსელებში მოქალაქეები წერდნენ, რომ მხოლოდ ერთ ზოლში მოძრაობის გამო ჭავჭავაძის გამზირი გადატვირთული იყო და შაბათ დღეს დიდი ხანი საცობში დგომა მოუწიათ.