BBC-ის ცნობით, იტალიის პრეზიდენტმა სერგიო მატარელამ მთავრობის მეთაურის თანამდებობა მოქმედ საგარეო საქმეთა მინისტრს პაოლო ჯენტილონის შესთავაზა. ჯენტილონი პრემიერმინისტრის მოვალეობის შემსრულებლის, მატეო რენცის თანაგუნდელია, დემოკრატიული პარტიიდან. ადგილობრივი მედიის ინფორმაციით, თუკი მის კანდიდატურას მხარს დაუჭერენ, ახალი მთავრობა რამდენიმე დღეში ჩამოყალიბდება.

მატეო რენცი თანამდებობაზე 2,5-წლიანი საქმიანობის შემდეგ, 5 დეკემბერს გადადგა. რენცის გადადგომის მიზეზი იმ რეფერენდუმის შედეგი იყო, რომელშიც საკონსტიტუციო რეფორმის მისი ვერსია ვერ გავიდა. იტალია, რომელიც ევროზონაში ეკონომიკის სიძლიერით მესამე ქვეყანაა, პოლიტიკურ არეულობაში გაეხვია.

რენცის სურდა რეფორმის გატარება იტალიის პოლიტიკურ სისტემაში. მას უნდოდა ცენტრალური მთავრობის გაძლიერება და სენატისთვის ძალაუფლების შემცირება. მისი ოპონენტები მიიჩნევდნენ, რომ რეფორმა თავად პრემიერს მეტისმეტ ძალაუფლებას მიანიჭებდა, რასაც დაეთანხმნენ ამომრჩევლებიც.

იტალიელების მხოლოდ 40,9 პროცენტმა დაუჭირა მხარი მის მიერ შეთავაზებულ ცვლილებებს, 59,1%-მა კი რენცის წინააღმდეგ მისცა ხმა. რეფერენდუმში მონაწილეობა 33-მა მილიონმა იტალიელმა მიიღო.

მატეო რენცის გადადგომის გადაწყვეტილება ევროკავშირთან არსებული შეთანხმებების შეწყვეტასაც ეხმაურება.