ამ კვირას 2020 წლის ემის დაჯილდოების ნომინანტები გამოვლინდნენ. წლევანდელი ემი გამორჩეული იმით იქნება, რომ იგი პირველად გაიმართება ვირტუალურ ფორმატში.

დაჯილდოების ვირტუალური ცერემონიის შესახებ უკვე შეატყობინეს ნომინანტებს.

"პროდიუსერები აქტიურად ცდილობენ, ნომინანტებს შეატყობინონ, რომ გვსურს ჩავატაროთ ცერემონია, რომელიც საზეიმოც იქნება და უსაფრთხოც", — ამბობს ტელეკომპანია ABC თავის განცხადებაში, — "მოუთმენლად ველოდებით, როდის შეგვეძლება, რომ ყველაზე დიდი სატელევიზიო საღამოს შესახებ დაზუსტებული ინფორმაცია გაგიზიაროთ".

როგორც წერილშია მითითებული, ჩაცმულობა ყველანაირი შეიძლება იყოს — ტრადიციული შოუს კოსტიუმებიდან მოდურ პიჟამებამდე.

რის ნახვას შეიძლება ველოდოთ რიგით 72-ე ემის დაჯილდოების შოუზე?

1. როგორ ულმობლად შეაწყვეტინებს Wi-Fi-ის მოულოდნელი გათიშვა ემოციურ და ცრემლნარევ სიტყვას გამარჯვებულს

ფოტო: Bolas / Gifer

2. როგორ სწრაფად გამორთავენ ნომინანტები კამერას, როცა ნომინაციას ვიღაც სხვა მოიგებს

ფოტო: Tenor

Zoom-ის ოთხკუთხედებში არსებულ ვარსკვლავების იმედგაცრუებულ სახეებს, ცხადია, ვერ ვიხილავთ, თუმცა, წარმოიდგინეთ, რაოდენ სახალისო იქნებოდა ეს.

3. როგორ გმირულად ეცდება ჯიმი კიმელი დაჯილდოების ცერემონია წაიყვანოს აუდიტორიის გარეშე, მაშინ როცა ნებისმიერ წუთს შეიძლება, გაუთვალისწინებელმა ტექნიკურმა ხარვეზმა იჩინოს თავი

4. დაჯილდოების შემდეგ დღეს მედიაში განხილული ვარსკვლავების ჩაცმულობა, ფონი, შინაური ცხოველები და სახლის ავეჯი

5. თავმომწონე ადამიანების სიტყვები, რომლებიც მაყურებლებს მოუწოდებენ, რომ ატარონ პირბადე, დაიცვან სოციალური დისტანცია და ტრამპს ხმა არ მისცენ

6. ის ერთი გამარჯვებული, რომელიც აშკარად მთელი დღე სვამდა ვიდეოჩართვამდე

წერილით ასევე ვიგებთ, რომ ე.წ. წითელი ხალიჩაც ვარსკვლავებს დისტანციურად ექნებათ, ალბათ, საკუთარ სახლში:

"ჩვენ მოვიწვიეთ ტექნიკური პერსონალის, პროდიუსერების და შოუს შემქმნელების საუკეთესო გუნდი ჯიმი კიმელთან და თქვენთან თანამშრომლობისთვის, რათა შევძლოთ თქვენი და თქვენი ახლობლების (ან ვისთან ერთად დასწრებასაც გადაწყვეტთ) გადაღება სახლში ან ნებისმიერ თქვენ მიერ არჩეულ ადგილას. ყველანაირად ვეცდებით, საუცხოოდ წარმოგაჩინოთ — უახლესი ტექნოლოგიური ხერხების საშუალებით შევძლებთ საუკეთესო კამერებით და განათებით გადავიღოთ ეს ყველაფერი. მოუთმენლად ველოდებით, როდის შევქმნით თქვენთან ერთად თქვენს მომენტებს "ეკრანზე".

ემის დაჯილდოება 20 სექტემბერს გაიმართება და ამერიკულ ტელეარხ ABC-ზე გადაიცემა.