შინაგან საქმეთა სამინისტროს ინფორმაციით, ფეხბურთის ფედერაციის ყოფილი ვიცე-პრეზიდენტის, ლერი სულაბერიძის ავტომანქანის მისამართით გასროლის საქმეზე დაკავებული ადამიანი დანაშაულს აღიარებს.

უწყების განცხადებით, გამოძიებით დადგინდა, რომ ბრალდებულმა 2020 წლის 28 ივლისს, ავტომობილიდან რამდენჯერმე გაისროლა სხვა ავტომობილის მიმართულებით.

"1980 წელს დაბადებული ი.ღ. ცეცხლსასროლი იარაღისა და საბრძოლო მასალის მართლსაწინააღმდეგო შეძენა-შენახვა-ტარების ბრალდებით, თბილისში დააკავეს", — ნათქვამია შსს განცხადებაში.

წყნეთში სროლა გუშინ ღამით მოხდა. შინაგან საქმეთა სამინისტროს ინფორმაციით, გამოძიება ორი მუხლით, საქართველოს სისხლის სამართლის კოდექსის 19-108 და 236 მუხლებით მიმდინარეობს, რაც განზრახ მკვლელობის მცდელობასა და ცეცხლსასროლი იარაღის უკანონო შეძენა-შენახვას გულისხმობს. დანაშაული 4-დან 7 წლამდე ვადით თავისუფლების აღკვეთას ითვალისწინებს.