დღეს ერთ-ერთმა მოქალაქემ, ირაკლი ნარსავიძემ, ფეისბუკზე ატვირთა ვიდეო, სადაც ჩანს, რომ პირს, რომელმაც სვანეთში შიშველი ფოტო გადაიღო, ბოდიშს ახდევინებენ.

შინაგან საქმეთა სამინისტროში On.ge-ს განუცხადეს, რომ რომ სამეგრელო-ზემო სვანეთის არცერთ განყოფილებაში განცხადება მუქარაზე არ შესულა:

"ამ პიროვნებას განცხადება არ აქვს შემოტანილი არცერთ განყოფილებაში, თუ თვითონ თვლის, რომ ეს იყო მუქარა, შემოიტანს თვითონ განცხადებას და მერე პოლიცია მოახდენს რეაგირებას. ამ ეტაპზე მსგავსი განცხადება არ არის შეტანილი პოლიციაში".

ფეისბუკზე ატვირთულ ვიდეოში ისმის გაფრთხილება, რომ მსგავსი რამ "აღარ გაბედონ".

"ყველამ გაითვალისწინეთ ამის შემდეგ, რომ ასეთი საქციელი აღარ განმეორდეს. თუ არადა ასე ლაპარაკით შემდეგში აღარ შემოვიფარგლებით" - წერია ვიდეოს აღწერაში.

ვიდეოში ასევე ისმის შემდეგ ფრაზები: "ყველა კანონზე და კონსტიტუციაზე მაღლა დგას ჩვენი ადათ-წესები და ჩვენი ტრადიციები", "სვანეთის, საქართველოს და ზოგადად კავკასიის მიწაზე ასეთი რამ არ უნდა ხდებოდეს", "თანამედროვე ჩარჩოები ჩვენთვის არაფერი არ არის", "ეს არ არის კულტურული" და ა.შ.

განახლება: ნიუსის თავდაპირველი ვარიანტის სათაური იყო შემდეგნაირად ფორმულირებული: "შსს: რეაგირება გვექნება, თუ პირი, რომელსაც ბოდიში მოახდევინეს, მუქარაზე განაცხადებს". ვინაიდან შსს-ს ჯერჯერობით არ შეუფასებია, პირმა ბოდიში მოიხადა თუ მოახდევინეს, აღნიშნული ციტატა დაზუსტდა.