საქართველოსთვის უვიზო მიმოსვლის შეჩერების მექანიზმზე დებატები სტრასბურგში, ევროპარლამენტის პლენარული სესიაზე, 14 დეკემბერს გაიმართება, ხოლო იმავე თემას კენჭს უყრიან მომდევნო დღეს, 15 დეკემბერს. აღნიშნული საკითხი დღის წესრიგში უკვე წერია.

ასევე 14 დეკემბერს გაიმართება სამმხრივი მოლაპარაკებების ფორმატი საქართველოს სავიზო რეჟიმის ლიბერალიზაციის საკითხზე შესაბამისი რეგულაციის ცვლილების საბოლოო ტექსტის შეთანხმების მიზნით. მისი დადებითი შედეგით დასრულების შემთხვევაში კი სავარაუდოდ, იანვარის პლენარულ სხდომაზე უყრიან კენჭს საქართველოს ვიზების ლიბერალიზაციის მინიჭების საკითხს.

ამის შესახებ, რადიო თავისუფლების ბრიუსელის ბიუროს კორესპონდენტი რიკარდ იოზვიაკი ტვიტერზე წერს. მისივე თქმით, ყველა კენჭისყრის დადებითად წარმართვის შემთხვევაში, ვიზების ლიბერალიზაცია საქართველოსთვის თებერვალში ან მარტში შევა ძალაში.