აზერბაიჯანში საქართველოს საელჩოს განცხადებით, აზერბაიჯანში მყოფი საქართველოს მოქალაქეები მოქმედი რეგულაციების გვერდის ავლით სამშობლოში დაბრუნებას ცდილობენ.

"ბოლო დღეებში, აზერბაიჯან-საქართველოს სახელმწიფო საზღვრის „წითელი ხიდის“ სასაზღვრო-გამშვებ პუნქტთან შეიქმნა არაორდინალური ვითარება.

კერძოდ, აზერბაიჯანის ტეროტორიაზე მყოფი საქართველოს მოქალაქეები, მოქმედი რეგულაციების გვერდის ავლით და აზერბაიჯანის რესპუბლიკაში საქართველოს საელჩოსთან კოორდინაციის გარეშე, შეუთანხმებლად და არაორგანიზებულად ცდილობენ სამშობლოში დაბრუნებას", — აცხადებენ საელჩოში.

მათივე ინფორმაციით, ამ მცდელობებმა გამოიწვია ურთულესი პრობლემები როგორც ლოგისტიკური, ისე ეპიდემიოლოგიური კუთხით.

საელჩო მიმართავს საქართველოს მოქალაქეებს, რომლებიც აზერბაიჯანში დროებით იმყოფებიან, სამშობლოში დაბრუნების სურვილის შემთხვევაში, წინასწარ დარეგისტრირდნენ საქართველოს საელჩოში და ასევე, მკაცრად დაიცვათ აზერბაიჯანში მოქმედი საკარანტინო რეგულაციები.

"COVID-19 ვირუსის წინააღმდეგ ბრძოლის პროცესში, აზერბაიჯანსა და საქართველოს შორის ჩაკეტილი სახელმწიფო საზღვრის პირობებში, აზერბაიჯანის ტერიტორიაზე დროებით მყოფი საქართველოს მოქალაქეთა სამშობლოში ეტაპობრივი დაბრუნება მოხდება მხოლოდ წინასწარი რეგისტრაციის საფუძველზე", — აცხადებენ საელჩოში.