მსოფლიოში ცნობილი სტრიმინგ სერვისი ნეტფლიქსი ახალ თურქულ სერიალზე If Only იწყებდა მუშაობს, თუმცა ადგილობრივი ხელისუფლების ცენზურის შემდეგ კომპანიამ დაგეგმილი სამუშაოები შეაჩერა.

როგორც სერიალის სცენარისტმა ეჩე იორენსმა განაცხადა, სერიალის გადაღებების დაწყებამდე ცოტა ხნით ადრე თურქეთის ხელისუფლებამ მათ გადაღების ლიცენზია არ მისცა, რადგან სერიალის ერთ-ერთი პერსონაჟი გეია.

"გეი პერსონაჟის გამო სერიალის გადაღების უფლება არ მოგვცეს და ეს სამომავლოდ კიდევ უფრო ცუდის მოლოდინს გვიჩენს", — აღნიშნა ეჩე იორენსმა.

მომავალი შოუს სიუჟეტური ხაზი ძირითადად უბედურ ქორწინებაში მყოფი ტყუპების დედის, რეიჰანის ისტორიის ირგვლივ უნდა განვითარებულიყო. როგორც სცენარისტი ამბობს, მასში არ იქნებოდა სექსის სცენები ან ფიზიკური კონტაქტი სხვა პერსონაჟებს შორის.

თუმცა, როგორც ჩანს, გეი გმირის ხსენებაც საკმარისი აღმოჩნდა, რომ თურქეთის ხელისუფლება გაღიზიანებულიყო: BBC-ის ცნობით, რამდენიმე დღის წინ მმართველი პარტიის წარმომადგენელმა ტვიტერზე გაავრცელა განცხადება, სადაც ის იმედოვნებს, რომ ნეტფლიქსი "თურქული კულტურისა და ხელოვნების მიმართ მეტ მგრძნობელობას გამოიჩენს სამომავლო თანამშრომლობისას".

ბოლო პერიოდში თურქეთის სახელმწიფოს სულ უფრო ხშირად ადანაშაულებენ ცენზურასა და სიტყვის თავისუფლების შეზღუდვაში. განსაკუთრებით გაიზარდა LGBT თემის მიმართ უთანასწორო მოპყრობაც: ბოლო ხუთი წლის განმავლობაში სტამბოლში პრაიდის ჩატარებაც აკრძალულია.

თურქეთის პრეზიდენტმა რეჯეპ ტაიპ ერდოღანმა აია-სოფიას მეჩეთად გადაკეთების განკარგულებას ხელი მოაწერა, რაც ბევრმა სეკულარობაზე უარის თქმად შეაფასა.

ფოტო: AP

აღსანიშნავია, რომ ეს პირველი შემთხვევა არ არის, როცა ნეტფლიქსი რომელიმე ქვეყნის ხელისუფლების მოთხოვნის გამო სხვადასხვა ფილმსა თუ სერიალზე გარკვეული ტიპის შეზღუდვებს ითვალისწინებს: მაგალითად ახალ ზელანდიაში აკრძალულია დოკუმენტური ფილმი The Bridge, რომელიც სან-ფრანცისკოში ოქროს კარიბჭის სახელით ცნობილ ხიდზე თვითმკვლელობების შემთხვევების შესახებ მოგვითხრობს. ასევე გერმანიაში აკრძალულია ცნობილი საშინელებათა ჟანრის ფილმი Night of the Living Dead.

ნეტფლიქსზე მსგავსად აკრძალული ფილმებისა და სერიალების სია შეგიძლიათ ნახოთ აქ.

რაც შეეხება თურქული სერიალის ირგვლივ განვითარებულ მოვლენებს, ნეტფლიქსმა დაადასტურა, რომ შოუზე მუშაობას აჩერებს:

"ნეტფლიქსი ჩვენი თურქული გუნდის შემოქმედებითი წევრების ერთგულია. ამაყი ვართ, რომ ასეთ ნიჭიერ ადამიანებთან გვიწევს მუშაობა. ჩვენ ამჟამად რამდენიმე პროექტზე ვმუშაობთ და მალე მათ ჩვენს მომხმარებლებს მთელ მსოფლიოში გავუზიარებთ".