ახალგაზრდა იურისტთა ასოციაციამ დღეს ბრიფინგი გამართა, სადაც მათ კულტურის მინისტრს, მიხეილ გიორგაძეს, პოლიტიკური პასუხისმგებლობის აღება მოსთხოვეს.

საიას მიერ გამოქვეყნებული დოკუმენტების მიხედვით, 2005 წელს სახელმწიფოსა და შპს International Event-ს შორის გაფორმდა ხელშეკრულება, რის შედეგადაც აღნიშნულ კომპანიას თბილისის საკონცერტო დარბაზი 45 წლიანი იჯარით გადაეცა.

2014 წლამდე International Event-ის მეწილეები იყვნენ კულტურის მინისტრი მიხეილ გიორგაძე, მისი მოადგილე კახი კანდელაკი და საინვესტიციო ფონდის დირექტორი დავით მენაბდე.

კომპანიაში მათი წილის ფლობის დროს, სახელმწიფოს წინაშე დავალიანება 700 000 ლარზე მეტი იყო, ხელშეკრულებით ნაკისრი ვალდებულებების შეუსრულებლობის გამო, ის დღეისთვის 1 245 000 ლარამდეა გაზრდილი. კომპანიის იურიდიულ მისამართად მიხეილ გიორგაძის ბინაა აღნიშნული.

"2011 წლიდან მოყოლებული, კომპანიას ფილარმონიის სარგებლობისთვის იჯარის ქირა არ გადაუხდია" - აცხადებს საიას იურისტი სულხან სალაძე.

იურისტი დასძენს, რომ ფილარმონიაში მხოლოდ 2016 წლის პირველ 6 თვეში 72 ღონისძიება ჩატარდა, საიდანაც კომპანიას, მისი თქმით 800 000 ლარამდე უნდა მიეღო:

"თუმცა ბიუჯეტში ერთი თეთრიც კი არაა გადახდილი".

საიას თავჯდომარე ანა ნაცვლიშვილი აცხადებს, რომ აუცილებლად უნდა შეწყდეს ხელშეკრულება და კომპანიამ International Event სახელმწიფოს წინაშე არსებული დავალიანება უნდა დაფაროს.

განახლება
მიხეილ გიორგაძემ საიას ბრალდებას უპასუხა. მისი თქმით, "აღნიშნულ ხარვეზს" გაასწორებს, თუმცა პოლიტიკური პასუხისმგებლობის აღებას არ აპირებს.