"რუსული ტროლებისა და ბოტების შესახებ ქმედებები ძალიან შემაშფოტებელია", — ამის შესახებ საქართველოს მეგობართა ჯგუფის თანათავმჯდომარემ, ადამ კინზინგერმა მთავარი არხის ეთერში ისაუბრა. მან ასევე აღნიშნა, რომ მხარს უჭერს ევროატლანტიკურ სტრუქტურებში საქართველოს ინტეგრაციას.

"რადგანაც მე საქართველოს კავკასიის ჯგუფის თავჯდომარე ვარ, საქართველოს შიდა საქმეებში არ ჩავერევი, რადგან ახლა საარჩევნო კამპანიაა და ველოდებით თავისუფალ არჩევნებს ოქტომბერში.

ზოგადად რუსული ბოტებისა და ტროლების ქმედებები ძალიან შემაშფოთებელია. ერთია,რომ გამოვყო სოციალური მედია პოლიტიკური მოძრაობისთვის, მაგრამ მეორეა დეზინფორმაცია, რომელსაც რუსეთი თავის თამაშების სცენარში იყენებს. მე ვერ გავაკეთებ მთავრობის ქმედებებზე კომენტარს, ქართველი ხალხის საქმეა შეაფასოს მთავრობა. რაც შემეხება მე, როგორც ტროლების სამიზნეს, ისევე, როგორც საქართველოსთან დაკავშირებით, ზოგადად ამ ტიპის შეტევები არაერთხელ მინახავს რუსეთის მხრიდან", — თქვა მან [მთავარი არხის თარგმანი].

ადამ კინზინგერმა ასევე ისაუბრა საქართველოს ხელისუფლების კრიტიკაზე და აღნიშნა, რომ ეს არ ნიშნავს, თითქოს აშშ-ში საქართველო არ მოსწონთ.

"კრიტიკა, რომელიც მოდის ამერიკიდან, იმას არ ნიშნავს, რომ ჩვენ არ მოგვწონს საქართველო. ჩვენ გვინდა რომ ის უკეთესი გახდეს. ერთი, რაც შემიძლია ვთქვა, ისაა, რომ რამდენიმე ქვეყანაა ევროპაში, რომელიც ეწინააღმდეგება საქართველოს ნატოში გაწევრიანებას. მე სრულიად ვუჭერ მხარს საქართველოს ევროინტეგრაციას", — თქვა მან.