დაავადებათა კონტროლის ცენტრის ხელმძღვანელის მოადგილე, პაატა იმნაძე ამბობს, რომ ქართული ოცნების მაჟორიტარობის კანდიდატების წარდგენაზე მისი დასწრება, მის პოლიტიკურ სიმპატიებზე მიანიშნებს.

"[პოლიტიკურ სიმპატიებზე] რომ არ მიანიშნებდეს, არც ვიქნებოდი", — განაცხადა იმნაძემ.

კითხვაზე, დაესწრებოდა თუ არა ის ოპოზიციის მსგავს ღონისძიებას, პასუხობს, რომ ოპოზიციას გააჩნია.

"გააჩნია ოპოზიციას, ვინც გაგინებს იმასთან არ მიხვალ ნორმალური ადამიანი", — განაცხადა იმნაძემ.

დღეს ქართულმა ოცნებამ მაჟორიტარობის კანდიდატები წარადგინა. წარდგენაზე საზოგადოებისთვის ცნობილ სახეებთდან ერთად იმყოფებოდნენ დაავადებათა კონტროლის ცენტრის ხელმძღვანელები: ამირან გამყრელიძე და პაატა იმნაძე, თბილისის ინფექციური საავადმყოფოს დირექტორი თენგიზ ცერცვაძე და პირველი საუნივერსიტეტო კლინიკის დირექტორი ლევან რატიანი.

გაიგეთ მეტი "ოცნების" მაჟორიტარების წარდგენაზე:

შეგახსენებთ, რომ მას შემდეგ, რაც მმართველი გუნდის ლიდერმა, ბიძინა ივანიშვილმა პირობა არ შეასრულა და პროპორციული საარჩევნო სისტემის კანონპროექტი ჩავარდა, ოპოზიცია ბოიკოტის რეჟიმში გადავიდა. საპროტესტო აქციების, პარლამენტის პიკეტირებების, აქციების დაშლისა და ფასილიტატორი ელჩების ჩართვის შემდეგ, ოპოზიცია და მმართველი გუნდი ახალ "თითქმის პროპორციულ" საარჩევნო სისტემაზე შეთანხმდა, რომლის მიხედვითაც პარლამენტში საარჩევნო სიით 120 დეპუტატი შევა, 30-ს კი მაჟორიტარულ ოლქებში აირჩევენ. საპარლამენტო არჩევნები 2020 წლის ოქტომბერში სწორედ ამ სისტემით ჩატარდება.