თბილისის მერი, კახა კალაძე ავრცელებს რენდერის ფოტოებს, რომლებშიც ჩანს როგორი იქნება პარლამენტის მიმდებარე ტერიტორია რეაბილიტაციის დასრულების შემდეგ. მისი თქმით, სპეციალური თარგები გააკეთეს იმისთვის, რომ ტერიტორია უფრო მეტად გამწვანდეს.

ფოტო: თბილისის მერია

ფოტო: თბილისის მერია

კალაძის განცხადებით, რეაბილიტაცია უტარდება შადრევანს, ფილები კი გაიწმინდა და შეკეთდა. მისივე თქმით, ისტორიული ფილები, რომლებიც 9 აპრილის მოვლენებს უკავშირდება დასაწყობებული აქვთ და რეაბილიტაციის შემდეგ ადგილზევე დააბრუნებენ. ამ დეტალებზე თბილისის მერმა პირდაპირ ეთერში ისაუბრა, რომელიც პარლამენტის მიმდებარე ტერიტორიიდან გაუშვა. ადგილზე მასთან ერთად იმყოფებოდნენ პარლამენტის თავმჯდომარე და მმართველი გუნდის ლიდერი მამუკა მდინარაძე.

რაც შეეხება 9 აპრილის მემორიალს, რომელიც რენდერის ფოტოებში არ ჩანს, უწყებაში On.ge-ს განუმარტეს, რომ მემორიალის გადატანა არ იგეგმება და რენდერის ფოტოები მხოლოდ გამწვანების თარგებს ეხება.

პარლამენტის წინა სივრცე საპროტესტო აქციებისა და მიტინგების მთავარი კერააა. 2019 წელს, თითქმის ნახევარი წლის განმავლობაში იქ აქტიურად იმართებოდა ანტისახელისუფლებო და ანტიოკუპაციური აქციები. წლის ბოლოს, 31 დეკემბერს, მერიამ შვილმოკლული მამის, მალხაზ მაჩალიკაშვილის საპროტესტო კარავი დაშალა და საახალწლო ატრაქციონები დადგა, შემდეგ კი გაშლის უფლება აღარ მისცა. 22 იანვარს მერიამ ტერიტორია შემოღობა და რეაბილიტაცია დაიწყო.

სარეაბილიტაციო სამუშაოების ირგვლივ დადგმულ მწვანე ღობეზე აქტივისტების მიერ გაკეთებული საპროტესტო წარწერებია. "სირცხვილია", "ბიძინას ბოსტანი", "გადადექი" და სხვა ფრაზები მას შემდეგ დააწერეს მასზე, რაც მერიამ მალხაზ მაჩალიკაშვილის კარავი აიღო.