საგარეო საქმეთა მინისტრი, რუსეთის საგარეო უწყების განცხადებას ეხმაურება და ამბობს, რომ რუსეთი ნაკისრი ვალდებულებებისგან დისტანცირებას ცდილობს.

საუბარია განცხადებაზე, სადაც ოკუპანტი ქვეყანა ბოლო პერიოდში რუსი მესაზღვრეების მიერ მოქალაქეების გატაცებას ეხმაურება და საქართველოს, აშშ-ს საელჩოსა და სახელმწიფო დეპარტამენტს პროვოკაციაში ადანაშაულებს.

მისი თქმით, რუსეთი საკუთარი თავის ნეიტრალურ აქტორად და ფასილიტატორას წარმოჩენას ცდილობს.

"რუსეთი ცინიკურად ცდილობს, ამ განცხადებაში საკუთარი თავის დისტანცირებას ნაკისრი ვალდებულებებისგან ჟენევის მოლაპარაკებების პროცესში. იცით, რომ ერთ-ერთი მთავარი მოთხოვნა არის ნაკისრი ვალდებულებების შესრულება. ის ცდილობს, რომ ფოკუსი გადაიტანოს საქართველოსა აფხაზეთისა და ცხინვალის წარმომადგენლებს შორის სავარაუოდო მოლაპარაკებების, იგივე ძალის არგამოყენება, ცეცხლის შეწყვეტა და ა.შ. და ჩვენთვის ახალი არ არის", — განაცხადა ზალკალიანმა რუსთავი 2-თან.

ზალკალიანის თქმით, საქართველოს მთავრობა თანმიმდევრულ პოლიტიკას გააგრძელებს, რაც სიტუაციის დეესკალაციასა და მშვიდობიან მოგვარებაზეა მიმართული.

რუსული მხარის მტკიცებით, ზაზა გახელაძემ, რომელიც 11 ივლისს რუსმა სამხედროებმა დაჭრეს და გაიტაცეს , ცეცხლი პირველმა გახსნა. მათივე თქმით, გახელაძემ ჩვენებაში აღიარა, რომ საოკუპაციო საზღვარი მიზანმიმართულად გადაკვეთა.

ქვეყანა, რომელსაც საქართველოს ტერიტორიები 2008 წლის შემდეგ ოკუპირებული აქვს, "პოლიტიკური სპექტაკლის" მოწყობაში თბილისს ადანაშაულებს. თუმცა პრობლემის მოგვარების გზად რუსეთი მხოლოდ საზღვრის დელიმიტაცია/დემარკაციაში ხედავს.

საგარეო უწყება მოუწოდებს საქართველოს, მოლაპარაკებების ფორმატების გამოყენებით პროვოკაციას ბოლო მოუღონ:

"საქართველოს ხელისუფლებისგან ველით ენერგიულ მუშაობას თავის მოსახლეობასთან, რათა საზღვრის უკანონო კვეთა აღარ მოხდეს".

ამასთან, რუსეთის საგარეო საქმეთა სამინისტრო პროვოკაციულს უწოდებს სახელმწიფო დეპარტამენტისა და აშშ-ს საელჩოს განცხადებებს, რომელიც საქართველოს ტერიტორიული მთლიანობისა და სუვერენიტეტის მხარდაჭერას ეხება.