რამდენიმე დღის წინ თანამედროვე რუსმა რეჟისორმა კირილ სერებრენიკოვმა თავისი ახალი და ჯერჯერობით უკანასკნელი ფილმის Петровы в гриппе (პეტროვები გრიპისას) ტრეილერი გამოაქვეყნა, რომელსაც მაყურებლები რეჟისორის ირგვლივ რუსეთში დაწყებული სამართლებრივი დევნის შემდეგ განსაკუთრებულად ელიან.

ფილმის პრემიერა წლევანდელ კანის კინოფესტივალზე უნდა შემდგარიყო, თუმცა, როგორც უკვე ვიცით, წელს ფესტივალი პანდემიის გამო ჩაიშალა. გავრცელებული ინფორმაციით, კირილ სერებრენიკოვის ამ ახალ კინოსურათს მომავალი წლის ფესტივალზე აჩვენებენ.

8 ივლისს გამოქვეყნებული ფილმის პირველი ტრეილერი გვარწმუნებს, რომ ის კანის კინოფესტივალზე კრიტიკოსებსა და კინომოყვარულებს ნამდვილად საინტერესო სანახაობას შესთავაზებდა:

კირილ სერებრენიკოვს მაყურებლები იცნობენ ისეთი ფილმებით, როგორებიცაა რადიკალური რელიგიური განწყობების კრიტიკით გაჟღენთილი მოსწავლე და ბიოგრაფიული ელემენტებით სავსე მუსიკალური დრამა ზაფხული, რომელიც ვიქტორ ცოის ცხოვრებაზე მოგვითხრობს.

პეტროვები გრიპისას მან რუსი მწერლის ალეკსეი სალნიკოვის 2016 წელს გამოქვეყნებული ამავე სახელწოდების მქონე გახმაურებული რომანის მიხედვით გადაიღო, რომელიც ბოლო წლების ერთ-ერთ ყველაზე წარმატებულ და მნიშვნელოვან თანამედროვე რუსულ ნაწარმოებად ითვლება.

როგორც წიგნის, ისე ფილმის სიუჟეტი ძირითადად პეტროვების ოჯახის ირგვლივ ვითარდება: მანქანის მექანიკოს პეტროვს, მის ბიბლიოთეკარ ცოლ ნურლინსა და მათ საერთო შვილს, უმცროს პეტროვს გრიპი დაემართებათ, რის გამოც მათ ფანტასტიკური ზმანებები დაეწყებათ.

ფილმში ასახული პოსტსაბჭოთა რუსეთში განვითრებული მოვლენები რეალობასა და ფანტასმაგორიას შორის მერყეობს. კირილ სერებრენიკოვი ცნობილია თანამედროვე რუსეთის სისტემური ხარვეზების კრიტიკით, შესაბამისად, მის ახალ ფილმშიც მწვავე სოციალური თემების რეპრეზენტაციას უნდა ველოდოთ.

შეგახსენებთ, რომ 26 ივნისს კირილ სერებრენიკოვს მოსკოვის სასამართლომ განაჩენი გამოუტანა და თაღლითობისა და თანხების მითვისების გამო სამწლიანი პირობითი სასჯელი მიუსაჯა. ბევრი თვლის, რომ ეს გამოხატვის თავისუფლების წინააღმდეგ გადადგმული ნაბიჯი იყო, რათა კირილ სერებრენიკოვი თავისი თამამი შემოქმედების გამო დაესაჯათ.

ამის გამო ბოლო წლებში სერებრენიკოვი შინაპატიმრობაში იყო და პეტროვები გრიპისას დისტანციურად გადაიღო. ეს ფაქტი კიდევ უფრო მეტ ინტრიგას სძენს ამ პროექტს, რომლის პრემიერის თარიღიც ჯერჯერობით უცნობია.

ასევე იხილეთ: