შერიგებისა და სამოქალაქო თანასწორობის საკითხებში სახელმწიფო მინისტრის მოვალეობის შემსულებელის, ლია გიგაურის ინფორმაციით, კასპიდან ოკუპანტების მიერ გატაცებული კაცი ახალგორის საავადმყოფოშია და მის სიცოცხლეს საფრთხე არ ემუქრება. მის კომენტარს უწყების პრესსამსახური ავრცელებს.

"რუსეთის საოკუპაციო ძალების დესტრუქციული პრაქტიკა გრძელდება, მათ თავისი სახე დღეს კიდევ ერთხელ წარმოაჩინეს და პარალელურად იმისა, რომ ბორდერიზაციის პროცესი გრძელდება და მოსახლეობა მუდმივად შიშის ქვეშ იმყოფება, დღეს გვქონდა ძალიან მძიმე ინციდენტი, სოფელში სხვილოს ციხის ტერიტორიაზე, სადაც ახალგაზრდა მამაკაცი ჩვენი ინფორმაციით სოკოს საკრეფად იყო წასული, მათ ჯერ დაჭრეს ცეცხლსასროლი იარაღით და შემდეგ კი დააკავეს და გადაიყვანეს ოკუპირებულ ტერიტორიაზე. ამჟამად როგორც ჩვენთვის ცნობილია ახალგაზრდა მამაკაცის სიცოცხლეს საფრთხე არ ემუქრება და ის იმყოფება ახალგორის საავადმყოფოში", — ამბობს გიგაური.

მან ასევე აღნიშნა, რომ ცხელი ხაზი ინფორმაციის მიღებისთანავე აამოქმედეს, ასევე, ფაქტის შესახებ შეატყობინეს საერთაშორისო პარტნიორებს, ევროკავშირის სადამკვირვებლო მისიასა და ჟენევის თანათავმჯდომარეებს.

"ყველაფერს ვაკეთებთ იმისთვის, რომ რაც შეიძლება სწრაფად დასრულდეს ეს ინციდენტი, დროულად გადმოვიყვანოთ და გავათავისუფლოთ ტყვეობისაგან მამაკაცი და რაც მთავარია მის ჯანმრთელობას შემდგომში საფრთხე არ შეექმნას", — აცხადებს გიგაური.

ოკუპანტებმა კასპში კაცი დღეს გაიტაცეს, მანამდე კი ცეცხლსასროლი იარაღით დაჭრეს.