საქართველოს შინაგან საქმეთა სამინისტროს მტკიცებით, მცხეთაში, სადაც გიორგი შაქარაშვილის მეგობარი გურამ ამირხანაშვილი იმალებოდა, ხანძარი მეტალის დამუშავების შედეგად გაჩნდა.

უწყების განცხადებით, მედიაში გავრცელებული ინფორმაცია ხანძრის ხელოვნურად გაჩენის შესახებ არის "მორიგი სიცრუე და მიზანმიმართულად საზოგადოების შეცდომაში შეყვანის მცდელობა".

"საგამოძიებო მოქმედებების შედეგად გამოვლინდა, რომ 4 ივლისს, არაგვის ხიდის მიმდებარე ტერიტორიაზე გაჩენილი ხანძარი მეტალის დამუშავებამ გამოიწვია. შესწავლილი ფაქტობრივი გარემოებებით დადგინდა, რომ 1980 წელს დაბადებული ლ.ყ., ჯართის შეგროვების მიზნით, ადგილზე მეტალს ამუშავებდა და დაადასტურა, რომ ამ პროცესში ბალახს მოეკიდა ცეცხლი. ფაქტზე გამოძიება საქართველოს სისხლის სამართლის კოდექსის 188-ე მუხლით მიმდინარეობს", — ამბობენ შსს-ში.

რამდენიმე დღუს წინ გიორგი შაქარაშვილის საქმეზე ერთ-ერთი დაკავებულის ადვოკატმა, გიორგი გელხაურმა გაავრცელა ინფორმაცია, რომ ტერიტორია, სადაც საქმის მთავარი მოწმე, გურამ ამირხანაშვილი იმალებოდა, დამწვარია. ამ განცხადებას შსს-ს ბრიფინგზე უპასუხა მინისტრის მოადგილემ და თქვა, რომ ხანძართან დაკავშირებით ცალკე გამოძიება მიმდინარეობს.