წარმოუდგენლად ნიჭიერი მიკაელა კოელი პატარა ეკრანებზე თავისი მორიგი ძლიერი, დამაფიქრებელი სერიალით I May Destroy You (შემიძლია, გაგანადგურო) დაბრუნდა.

სერიალი ნაწილობრივ ემყარება მიკაელას პირად გამოცდილებას სექსუალურ ძალადობაში და მოგვითხრობს არაბელას ისტორიას — იმედისმომცემი მწერლის, რომელსაც მალე ახალი წიგნის ჩაბარების ვადაში ჩატევა უწევს. გონების გასანიავებლად ის გადაწყვეტს, ღამით მეგობრებთან ერთად გავიდეს გასართობად. მომდევნო დილას ის იაზრებს, რომ წინა ღამით მომხდარი მოვლენებიდან არაფერი ახსოვს, შემდეგ კი აღმოაჩენს, რომ მას ნარკოტიკი შეურიეს და გააუპატიურეს.

ფოტო: BBC One / HBO

2016 წელს Chewing Gum-ის მეორე სეზონის სცენარის წერისას მიკაელამ შესვენება გადაწყვიტა და მეგობრებთან ერთად გავიდა ბარში. მიკაელას სასმელში რაღაც შეურიეს, შემდეგ კი მასზე ორმა კაცმა სექსუალურად იძალადა.

შოუ სქესობრივ კავშირზე თანხმობის ნიუანსებს მიმოიხილავს და გვახედებს გაუპატიურების ჭეშმარიტად შემაშფოთებელ კულტურაში, ამის პარალელურად კი ხაზს უსვამს მეგობრობისა და სექსუალური აქტიურობის თემებს.

I May Destroy You მიკაელას შექმნილი, დაწერილი და გადაღებულია და ის თვითონაც მონაწილეობს მასში, თუმცა სანამ სერიალი BBC One-სა და HBO-ზე გამოჩნდებოდა, ის ჯერ Netflix-ს შესთავაზა. Vulture-სთვის მიცემული ბოლო ინტერვიუდან გავიგეთ, თუ რატომ თქვა უარი მიკაელამ ნეტფლიქსის $1-მილიონიან შემოთავაზებაზე.

ვინც არ იცით, მიკაელამ წარსულში უკვე ითანამშრომლა Netflix-თან თავის ცნობილ სერიალებზე Chewing Gum და Black Earth Rising, ასევე Black Mirror-ის ორ ეპიზოდზე.

Netflix-ის ხელგაშლილი შემოთავაზების მიუხედავად, გარიგების თანახმად 32 წლის ლონდონელს არავითარი საავტორო უფლება არ რჩებოდა შოუზე, რომელიც მან შექმნა.

ფოტო: Netflix

ეს ყველაფერი არაა. მიკაელამ თავისი სააგენტო CAA-ც დაითხოვა, რომელიც მას Netflix-ის შემოთავაზების მიღებისკენ მოუწოდებდა, რადგან გარიგებიდან კომპანიასაც თანხა რჩებოდა.

Netflix-თან მოლაპარაკებისას საბოლოო უარამდე მიკაელამ სცადა, თავისი საავტორო უფლებების 5% მაინც დაეტოვებინა, ბოლოს კი სულ რაღაც ორზეც თანახმა იყო.

"მობილურში სიჩუმე ისმოდა. მითხრა, 'აქ ასე არ ვაკეთებთ. არავინ აკეთებს ამას, დიდი არაფერია'. მე ვუთხარი, 'თუ დიდი არაფერია, მაშინ ჩემი უფლებების 5%-ის ქონა ძალიან გამახარებდა'. ქალმა მიპასუხა, რომ უფროსობასთან უნდა გადაემოწმებინა, შემდეგ კი ცოტა ხნით გაჩუმდა და მითხრა, 'მიკაელა? მინდა, იცოდე, რომ შენით ძალიან ვამაყობ. სწორ რამეს აკეთებ'. შემდეგ კი გამითიშა. ეს სიტყვები რომ მითხრა, მაშინღა გავიაზრე — მე არ ვარ გიჟი, სიგიჟე ეს ყველაფერია", — ამბობს მიკაელა.

2017 წელს მიკაელამ BBC-ს წარუდგინა I May Destroy You და შეთანხმება არათუ შედგა, კომპანიამ მას ასევე შესთავაზა "ადგილი პროდიუსირების მაგიდასთან, სრული კრეატიული კონტროლი და საავტორო უფლებები ნამუშევარზე".

სერიალის პრემიერა 7 ივნისს შედგა HBO-ზე და 8 ივნისს — BBC One-ზე.