საქართველოს კალათბურთის ნაკრების კაპიტანმა, თორნიკე შენგელიამ მოსკოვის ცსკა-სთან, რუსული არმიის გუნდთან, სამწლიანი კონტრაქტი გააფორმა. ამის შესახებ ინფორმაცია კლუბმა ტვიტერზე გაავრცელა.

"გელოდებით მოსკოვში" და "კეთილი იყოს შენი მობრძანება მოსკოვში" — წერია ქართულად და ინგლისურად ვიდეოზე, რომელშიც ამ ფაქტის აღსანიშნად კლუბმა გაავრცელა.

ფოტო: CSKA Moscow / Twitter

ამ ეტაპზე უცნობია კალათბურთის ფედერაციის პოზიცია. On.ge ცდილობს მათთან დაკავშირებას და კომენტარს მიღებისთანავე შემოგთავაზებთ.

თორნიკე შენგელიას გადასვლაზე ინფორმაცია რამდენიმე თვეა ვრცელდება, თუმცა აქამდე არ დადასტურებულა. 7 ივლისს ამ საკითხს შენგელიაც გამოეხმაურა და განაცხადა, რომ გადაწყვეტილება ჯერ მიღებული არ ჰქონდა. მისი თქმით, ამ გუნდში წასვლით ან არ წასვლით საქართველოს მიმართ დამოკიდებულება არ იცვლება.

"იმედიც მაქვს, რომ ჩემი ქვეყნის და ხალხის დამოკიდებულებაც ჩემ მიმართ არ შეიცვლება. ჩემს პატრიოტიზმზე და სიყვარულზე სამშობლოს მიმართ, რამე ახსნა-განმარტებების დაწყება, ცოტა უცნაურად მიმაჩნია, სიმართლე გითხრათ", — თქვა მან.

შენგელიას განცხადებით, ერთადერთი სერიოზული შემოთავაზება და დაინტერესება ცსკა-სგან ჰქონდა და მათთან მოლაპარაკებებს აგენტი აწარმოებდა.