გიორგი შაქარაშვილის საქმეზე გამოკითხული ლაშა ლურსმანაშვილი ამბობს, რომ სათვალთვალო კამერებში თეთრპერანგიანი პირია. ამის შესახებ მან მთავარ არხთან ისაუბრა.

გიორგი შაქარაშვილის საქმეზე ის თბილისში გამოკითხვაზე 8 ივლისს იყო. მას შემდეგ, რაც ლურსმანაშვილმა განაცხადა, რომ თეთრპერანგიანი პირი თვითონაა, სოცილურ ქსელებში მსგავსების განხილვა დაიწყეს.

"შავ ტანსაცმელში და თეთრ ტანსაცმელში სხვადასხვაა ადამიანი, მაგრამ მე ვარ-მეთქი, ვადასტურებ", — აღნიშნა მან.

ლურსმანაშვილის თქმით, ხაშურიდან თბილისში თავის პირად საქმეზე ჩავიდა, მიკროავტობუსიდან გადმოსვლის შემდეგ კი მას გურამ ამირხანაშვილი მიუახლოვდა, რომელმაც დარეკვა სთხოვა:

"არ ვცნობ ვინ არის, ჩვეულებრივი პატარა ბიჭია. დასარეკი არ მქონდა და არ დავარეკინე. დაახლოებით, 10 წამი ვესაუბრე. კადრში ჩანს, რომ მომყვება, მაგრამ ჩვენ შორის საუბარი არ ყოფილა".

როგორც იგი აღნიშნავს, ტანსაცმელი, რომელიც იმ ღამით ეცვა, ახლა საგამოძიებო ორგანოებს აქვთ.

გიორგი შაქარაშვილის საქმეზე ტელეკომპანია ფორმულამ და მთავარმა არხმა ახალი ვიდეოკადრები გაავრცელეს, რომელშიც აქამდე უცნობი თეთრი მიკროავტობუსი და თეთრპერანგიანი პირი ფიქსირდება.

მთავარმა არხმა გაავრცელა ვიდეოკადრები, რომლის მოქმედებები დიდუბის მეტროსთან ვითარდებოდა. კადრებში ჩანს, რომ მას შემდეგ, რაც ამირხანაშვილი მანქანიდან ბენზინგასამართ სადგურზე ჩამოსვეს, ის რამდენიმე მეტრს გადის, გზის გადაკვეთას ცდილობს, თუმცა უკან ბრუნდება და სიბნელეში ჩერდება.

მალევე ბენზინგასამართ სადგურთან ჩერდება თეთრი ფერის მიკროავტობუსი, რომელსაც ფანჯრები არ აქვს. იქიდან გადმოდის თეთრპერანგიანი პირი, რომელიც ამირხანაშვილისკენ მიდის. მთავარი არხის ინფორმაციით, სწორედ ეს თეთრპერანგიანი პირი შეიძლება იყოს ან ავთანდილ ბილანიშვილი ან მისი მეგობარი, რომელიც მას ვიზუალურად ჰგავს.

ბოლო პერიოდში მედიაში გავრცელებული ინფორმაციის გამო გამოკითხვაზე დაიბარეს ავთანდილ ბილანიშვილი, იგივე "კაწრო". იგი გიორგი შაქარაშვილის საქმესთან რაიმე კავშირს უარყოფს.

19 წლის გიორგი შაქარაშვილის ცხედარი 4-დღიანი ძებნის შემდეგ 22 ივნისს, მდინარე არაგვში იპოვეს. შაქარაშვილის საქმეზე დაკავებულ 17-ვე პირს წინასწარი პატიმრობა შეეფარდა. დაკავებულებს ბრალი ორი ან მეტი პირის მიმართ განხორციელებული ჯგუფური ძალადობის, ჯგუფური ძალადობის ორგანიზების და ამავე ძალადობაში მონაწილეობის და ჯგუფურად თავისუფლების უკანონო აღკვეთის ფაქტებზე აქვს წარდგენილი.

საქმეზე გამოძიება საქართველოს სისხლის სამართლის კოდექსის 126-ე მუხლის პირველი პრიმა ნაწილის "ბ" და "გ" ქვეპუნქტებით, 225-ე მუხლის პირველი და მე-2 ნაწილებით და 143-ე მუხლის მე-3 ნაწილის "ა" ქვეპუნქტით მიმდინარეობს.

ამავე თემაზე: