თბილისის მერია გარეუბნებში საბაგიროების მშენებლობას გეგმავს. 8 ივლისის მთავრობის სხდომამდე, მერმა კახი კალაძემ განაცხადა, რომ არჩეულია ორი დერეფანი, მათ შორის, სამგორი-ვაზისუბნისა და სარაჯიშვილი-ზღვისუბნის საბაგირო პროექტები.

კალაძის თქმითვე, საბაგიროების პროექტირება და მშენებლობა საქართველოს მთავრობის სასესხო შეთანხმებით, საფრანგეთის განვითარების სააგენტოს მიერ დაფინანსდება.

ამ ორი პროექტიდან, პირველი სამგორი-ვაზისუბნის საბაგიროს პროექტი დაიწყება, რისთვისაც თბილისის მერის განცხადებით, 30 მილიონი ევროა გამოყოფილი. პროექტის დასამუშავებლად მერია მიმდინარე თვეში გეგმავს კონსულტანტის დაქირავებას, ხოლო მომავალი წლის დასაწყისში მშენებლობის ტენდერი გამოცხადდება.

"ვაზისუბანში 40 ათასზე მეტი მაცხოვრებელია და საბაგირო მათ მეტროსადგურ სამგორთან დააკავშირებს, რაც გააუმჯობესებს სატრანსპორტო მდგომარეობას. სამგორი-ვაზისუბნის საბაგირო განთავსდება მეტროსადგურ სამგორის, ხოლო სარაჯიშვილი-ზღვის უბნის საბაგირო, მეტროსადგურ სარაჯიშვილის მიმდებარედ. ერთი საბაგირო სადგური განთავსდება თემქის ხევში. ვაპირებთ თემქისხევის რეაბილიტაციას",— განცხადა თბილისის მერმა.