აქცია ცენტრ პოინტის მფლობელთა დასჯის მოთხოვნით

დღეს, 13 მაისს, საქართველოს მთავარი პროკურატურის წინ ის ადამიანები შეიკრიბნენ, რომლებმაც შპს ცენტრ პოინტ ჯგუფისგან 2006–2007 წლებში ბინები შეიძინეს, ფულიც გადაიხადეს, მაგრამ მათ ბინები დღემდე არ მიუღიათ. საქალაქო სასამართლოს მიერ საქმის განხილვის გაჭიანურებასა აპროტესტებენ. გარდა ამისა, მათ მოთხოვნები აქვთ პროკურატურის მიმართაც:

  • მთავარ პროკურორ ირაკლი შოთაძესთან შეხვედრა;
  • შპს ცენტრ პოინტის დამფუძნებლებისა და შპს დექსუსის წარმომადგენლების მიმართ გამოძიების განახლება;
  • ამ წლის 8 აგვისტომდე მაია რჩეულიშვილის, რუსუდან კერვალიშვილისა და ივანე ცაგურიას გასამართლება;
  • პროკურატურის მხრიდან ივლისის თვემდე ცენტრ პოინტის დარჩენილი საქმეების გამოძიება და სასამართლოსთვის განსახილველად გადაცემა.

როგორც აქციის ერთ-ერთმა ორგანიზატორმა, ეკა შაფათავამ On.ge-ს უთხრა, ცენტრ პოინტმა 2000 წელს დაწყებული და დაუსრულებელი მშენებლობებიდან თანხის 80% კლიენტებისგან უკვე მიიღო, თუმცა, არ შეასრულა აღებული ვალდებულებები და ასეულობით ოჯახს ბინა ამ დრომდე არ გადასცემია:

“დარჩენილი დებიტორული დავალიანება, რითიც აპელირებენ რჩეულიშვილები, არის დექსუსის დროს დღგ-ით დაკისრებული თანხები, რისი გადახდის ვალდებულება წესით ფიზიკურ პირებს არ აქვთ”.

ეკა შაფათავის თქმით, დამატებით დაკისრებული თანხების გადახდის ვალდებულებისგან გათავისუფლება შესაძლებელია მხოლოდ სასამართლოს დასრულების შემთხვევაში:

“2013 წელს ცენტრ-პოინტის დამფუძნებლებს, მაია რჩეულიშვილსა და რუსუდან კერვალიშვილს, ასევე, დექსუსის თანამშრომელს ივანე ცაგურიას თაღლითობის ბრალდებით წაუყენეს ბრალი. შემდეგ მათ 15 დეპუტატი ჩაუდგა თავდებში და წინასწარი პატიმრობა შეუცვალეს გირაოთი”.

აქციის მონაწილეები პროკურატურისა და სასამართლოს მხრიდან პროცესის გაჭიანურებას აპროტესებენ:

“თუ საძიებო საქმე აღარაა, გამოიტანონ განაჩენი. უმეტესობა არ ვართ დაკითხული და იგნორირებულები ვართ”.

აქციის მონაწილეების თქმით, ცენტ პოინტის დამფუძნებლები დღემდე აგრძელებენ თაღლითობას და მათ იძულებით თანხების გადახდის ვალდებულებაზე ხელს აწერინებენ.

იმ დეპუტატების ფოტოები, რომლებიც თავდებად დაუდგნენ კერვალიშვილს, პროკურატურის წინ გამართული აქციიდან. 13 მაისი, 2016 წელი

ფოტო: თამარა ღამბაშიძე / On.ge

აქციის მიმდინარეობისას პროკურატურის თანამშრომლებმა აქტივივისტებს პროკურატორის წარმომადგენელთან შეხვედრა შესთავაზეს, რის შემდეგაც აქციის ორგანიზატორები გენერალური ინსპექციის უფროს პროკურორ ზურაბ ბენდელიანს შეხვდნენ.

როგორც შეხვედრიდან გამოსულმა ეკა შაფათავამ გვითხრა, ბენდელიანი მათ დახმარებას დაჰპირდა:

“შეგვპირდა, რომ პირად კონტროლზე აიყვანს საქმეს და ეცდება, შეგვახვედროს ირაკლი შოთაძეს, შედეგებსაც იმედია უახლოეს მომავალში ვნახავთ”.

ბენდელიანთან შეხვედრის შემდეგ, ეკა შაფათავა და აქციის რამდენიმე მონაწილე თბილისის მთავარი პროკურორის მოადგილეს, მერაბ ჯერენაშვილს შეხვდა. შეხვედრიდან გამოსული შაფათავას თქმით, მერაბ ჯერენაშვილი მათი საქმის შესახებ ინფორმირებული იყო:

"მერაბ ჯერანაშვილმა გვითხრა, რომ პროკურატურაც უკმაყოფილოა, სასამართლო პროცესის გაჩერების გამო მათ რამდენჯერმე მიმართეს კიდეც იუსტიციის საბჭოს, თუმცა უშედეგოდ".

როგორც ჯერენაშვილმა დაზარალებულებს უთხრა, ადრე ცენტრ პოინტის საქმეს ერთი გამომძიებელი უძღვებოდა, ახლა გამოძიებაში დამატებით სამი გამომძიებელია ჩართული პროცესის დასაჩქარებლად. ამ ეტაპზე კი ყველა ეპიზოდის შესწავლა მიმდინარეობს.

ცენტრ პოინტის კლიენტები საპროტესტო აქციების გაგრძელებას აპირებენ.

ცენტრ პოინტისგან დაზარალებულების აქცია მთავარი პროკურატურის წინ, 13 მაისი, 2016

ფოტო: თამარა ღამბაშიძე / On.ge

ცენტრ პოინტის პასუხი აქციის მონაწილეებს

როგორც რუსუდან კერვალიშვილისა და მაია რჩეულიშვილის ადვოკატმა ლალი ჩოდრიშვილმა On.ge-ს უთხრა, სასამართლოში საქმის წარმოების პროცესის გაჭიანურება ბრალდებულების მიზეზით არ მომხდარა:

“მიზეზი არის მოსამართლის დატვირთული გრაფიკი და ის რომ, პროკურორი შეიცვალა ჩვენგან დამოუკიდებლად. მან კი საქმის გასაცნობად გარკვეული ვადა მოითხოვა. ამ ეტაპზე საქმის განხილვა მიმდინარეობს. მგონია, რომ მაისის ნახევრიდან დაიწყება პროცესი”.

ადვოკატის თქმით, კომპანიასთან დადებული ხელშეკრულება სრულად არ შეუსრულებიათ არც მომავალ მობინადრეებს:

“რაც შეეხება დამატებით თანხებს, ჩვენ ვითხოვთ მხოლოდ დებიტორული დავალიანების დაფარვას, რადგან [ხელშეკრულების] გარკვეული ნაწილი ძალიან ბევრს შეუსრულებელი აქვს და ეს სიტუაცია მხოლოდ ერთ ობიექტზე არ ხდება. ეს, ჯამში, საკმაოდ სოლიდური თანხა გამოდის”.

როგორც ლალი ჩოდრიშვილი განმარტავს, ცენტრ პოინტი კომპანიას მომავალი მობინადრეებისგან მხოლოდ იმ თანხას ითხოვს, რაც ხელშეკრულებითაა გათვალისწინებული:

ყველამ უნდა იცოდეს და შეეგუოს, რომ ხელშეკრულება არის ორმხრივად შესასრულებელი და აქ სადაო არ უნდა იყოს არაფერი

რჩეულიშვილების ადვოკატი ლალი ჩოდრიშვილი

“ჩვენი ვალდებულებაა დასრულდეს პროექტები, პარალელურად არსებობს მათი ვალდებულებებიც. ყველამ უნდა იცოდეს და შეეგუოს, რომ ხელშეკრულება არის ორმხრივად შესასრულებელი და აქ სადაო არ უნდა იყოს არაფერი”.

ადვოკატის თქმით, ცენტრ-პოინტის მხრიდან მშენებლობების შეფერხებების მიზეზი 2008 წლის ომი და მსოფლიო კრიზისი გახდა, მშენებლობები ამ ეტაპზე კი მაია რჩეულიშვილის პირადი სახსრებით მიმდინარეობს:

“არცერთი მობინადრის უბინაოდ დატოვებას არ ვაპირებთ და გულწრფელად გეტყვით, მაია მოტივირებულია, რომ ყველა მობინადრე, ვისაც შემოტანილი აქვს თუნდაც ნაწილობრივი თანხა, იმ თანხების ფარგლებში მაინც დაკმაყოფილდეს”.

ლალი ჩოდრიშვილის თქმით, კომპანიას უფლება აქვს, რომ ხელშეკრულების შეუსრულებლობის შემთხვევაში რეალიზაცია მოახდინოს:

“თუმცა, ვითვალისწინებთ, რომ ჩვენი მიზეზითაც არის შეფერხებული მშენებლობა, ჩვენ ვცდილობთ, ერთობლივი გამოსავალი მოიძებნოს და არცერთი მობინადრე დარჩეს დაზარალებული”.

ადვოკატის თქმით, ცენტრ პოინტი მშენებლობებს აგრძელებს. ამ ეტაპზე კი კრწანისის ობიექტების მშენებლობა მიმდინარეობს.