მობილურ ინტერნეტს ერთი საყურადღებო თვისება აქვს — შეიძლება ზუსტად მაშინ ამოიწუროს, როცა ყველაზე მეტად გჭირდება. ამ დროს კიდევ უფრო ცუდი ისაა, რომ მობაილბანკში შესასვლელად და მეგაბაიტების შესაძენად ის ინტერნეტი გჭირდება, რომელიც უკვე აღარ გაქვს.

პრობლემის გადასაჭრელად და ცხოვრების კიდევ უფრო გასამარტივებლად თიბისიმ სიახლე დანერგა — აქ და ახლა, მობაილბანკით სარგებლობა ინტერნეტის ბალანსის გარეშეა შესაძლებელი. მომხმარებელს მობილურ ტელეფონში ინტერნეტი — ე.წ. Cellular data უნდა ჰქონდეს ჩართული, თუმცა, აპლიკაციის გამოყენებას ის ინტერნეტის დახარჯვის გარეშე შეძლებს. ამ თემაზე უფრო მეტს თიბისის ციფრული ბანკინგის განვითარების ხელმძღვანელი თეა კობახიძე გვიყვება.

თიბისის მობაილბანკი — მარტივი ცხოვრება ნაკლები ბარიერებით

თიბისის მობაილბანკს 600 000 ზე მეტი მომხმარებელი ჰყავს, რომელთა ნაწილი რეგიონებში ცხოვრობს. ყველასთვის ცნობილია, რომ საქართველოში დღემდე რჩება ტერიტორიები სადაც WiFi საერთოდ არაა ხელმისაწვდომი. რა თქმა უნდა, თიბისის მომხმარებლების ნაწილი მსგავს რეგიონებში ცხოვრობს. მათთვის, აპლიკაციით სარგებლობისთვის, მობილური ინტერნეტის ქონა აუცილებელი პირობაა, რაც დამატებით ფინანსებსაც მოითხოვს. მობაილბანკის ინოვაციური ფუნქცია მომხმარებლების ამ სეგმენტსაც აარიდებს თავიდან საზრუნავს და გამოუვალი სიტუაციებიდანაც თავის დაღწევას უხერხულობის გარეშე შეძლებენ.

თუმცა, სიახლე მხოლოდ რეგიონში მცხოვრებ ადამიანებს არ ეხებათ. როგორც თეა აღნიშნავს, არაერთ მომხმარებელთან ინტერვიუს დროს მოუსმენიათ და თავადაც ბევრჯერ დამდგარან მსგავსი პრობლემის წინაშე. "ამიტომ გავიაზრეთ, რომ მობილური ინტერნეტის მოხმარება მობაილბანკის აპლიკაციისთვის ბარიერი იყო და ვეცადეთ, ჩვენი მომხმარებლებისთვის მობაილბანკის უწყვეტ რეჟიმში სარგებლობის საშუალება ინტერნეტის დახარჯვის გარეშე მიგვეცა. დარწმუნებული ვართ, სიახლე მათ კიდევ უფრო გაუმარტივებს სასურველი მომსახურების მიღებას", — ამბობს თეა კობახიძე.

სიახლის დანერგვას, რომლის პროცესშიც მობაილბანკის და დეველოპერების გუნდი იყო ჩართული, 2 თვე დასჭირდა. ის საქართველოში არსებულ სამივე მობილურ ოპერატორზე გაიტესტა და ყველა ქსელის მომხმარებლისთვის თანაბრად ხელმისაწვდომია.

თეა აღნიშნავს, რომ ამ სიახლით მომხმარებელთა ქცევა იცვლება — მობაილბანკით სარგებლობისას მათ არ მოუწევთ დამატებით ბარიერზე, ინტერნეტის ქონაზე ფიქრი და ნებისმიერი ქმედების ან ოპერაციის შესრულება მათ მობილურ ინტერნეტს არ დაუხარჯავს.

"ეს დიდი კომფორტია მომხმარებლებისთვის. ისინი გამოუვალ სიტუაციებში განსაკუთრებით იგრძნობენ, თუ როგორ გაუმარტივდათ და შეეცვალათ აქამდე არსებული ქცევა", — ამბობს ის.

თიბისის მობაილბანკი, რომელიც მსოფლიოში საუკეთესოდაა აღიარებული, რამდენიმე თვის წინ განახლდა. მაშინ თიბისიმ მომხმარებლების მხრიდან წამოსული უკუკავშირის მიხედვით ზუსტად ამოიცნო, რომ მობაილბანკი ბევრად მეტია, ვიდრე უბრალოდ "ფინანსების სამართავი აპლიკაცია". ეს არის აპლიკაცია, რომელსაც ვსტუმრობთ მანამ, სანამ რაიმე გადაწყვეტილებას მივიღებთ და რომელიც გვეხმარება, გავიგოთ, როგორ უნდა ვიმოქმედოთ ჩვენი მიზნების მისაღწევად.

მობაილბანკი მუდმივად ახლდება და თიბისი აპირებს, აპლიკაციას კიდევ არაერთი ფუნქცია დაამატოს. "რამდენიმე დღეში მომხმარებლებს მობაილბანკიდან კომუნალური გადასახადების დაჯგუფება და ერთიანად გადახდა შეეძლებათ, რაც, ასევე, ძალიან გაუმარტივებს მათ ცხოვრებას", — ამბობს თეა.

მანამდე კი, აქ და ახლა, ინტერნეტის ბალანსის გარეშე მობაილბანკის გამოსაყენებლად მხოლოდ აპლიკაციის განახლებაა საჭირო.