ახალ წლამდე სულ უფრო და უფრო ცოტა დრო რჩება, რაც იმას ნიშნავს, ნაძვის ხის დადგმისა და მორთვის ოჯახური ცერემონიალი ახლოვდება. სახლში საახალწლო აქსესუარები ამაღლებულ განწყობას ქმნის, მაგრამ ვისაც სახლში კატა ჰყავს, მან უკვე იცის, რომ წინ სირთულეები ელის.

კატები ნაძვის ხეებს ოდითგანვე ერჩიან, თანაც იმდენად, რომ პატრონებს ეჭვი ეპარებათ, მათ საყვარელ ცხოველში გრინჩი ხომ არ ჩასახლდა. ფერადი ნათურები და გულდასმით შერჩეული სათამაშოები წამში შეიძლება გადაიქცეს თქვენი ფისოს მთავარ სამიზნედ, მაგრამ ამას ვერაფრით შეცვლით. ისღა გრჩებათ, ამ ფაქტზე უბრალოდ გაგეღიმოთ.

კატები რომ ნაძვის ხეებს მტრებად აღიქვამენ, ეს თემა სოციალური ქსელებისთვისაც ნაცნობია. უამრავი ვიდეო არსებობს, რომელშიც ეს ფუმფულა ცხოველები ყველაფერს ანადგურებენ, რაც ახალ წელთანაა დაკავშირებული.

მკაცრი აკრძალვა არ ჭრის. როგორ მოვიქცეთ?

შეძენამდე სწორად შეარჩიეთ ნაძვის ხე

ფოტო: kryzhov/shutterstock

ნაძვის ხის შეძენის პროცესში შინაური ცხოველის არსებობას ნუ დაივიწყებთ. არჩევანი მომცრო ნაძვის ხეზე გააკეთეთ. ამით სავარაუდო კატასტროფის მასშტაბებს შეამცირებთ და ზარალსაც მინიმუმამდე დაიყვანთ.

გამოიყენეთ მყარი სადგამი

ფოტო: Tibanna79/shutterstock

თუ არჩევანის გაკეთება ცოცხალ და ხელოვნურ ნაძვის ხეს შორის გიწევთ, უმჯობესია ხელოვნურზე შეჩერდეთ, რადგან მისი დამაგრება მყარ სადგამზე გაცილებით მარტივია. ხელოვნური ნაძვის ხეები კატებს ნაკლებად იზიდავთ, რადგან სპეციფიკური სუნი აქვთ. თანაც, ხელოვნურ ნაძვის ხეს დაზიანების შემთხვევაში მარტივად ააწყობთ თავიდან.

დადგით უსაფრთხო ადგილას

ფოტო: Bill Wolfe/shutterstock

დიდი მნიშვნელობა აქვს იმასაც, თუ სად მოათავსებთ ნაძვის ხეს. სასურველია მას ორი მხრიდან კედელი ესაზღვრებოდეს. ასე თავიდან აირიდებთ დამატებითი ნივთების ლეწვას იმ ტრაგიკულ მომენტში, როდესაც თქვენი კატა ვერაგულ ჩანაფიქრს განახორციელებს.

არ ჩამოკიდოთ სათამაშოები ნაძვის ხის ქვედა ტოტებზე

ფოტო: Alena Haurylik/shutterstock

სათამაშოების გადანაწილებასაც დიდი მნიშვნელობა აქვს: ნაძვის ხის ქვედა მხარეს ნაკლები სათამაშო დაკიდეთ, ზემოთ კი - შედარებით მეტი. არსებობს შანსი იმისა, რომ კატას ხეზე აცოცება დაეზაროს და დანებდეს.

არ ეთამაშოთ კატებს ნაძვის ხის სათამაშოებით

ფოტო: NIKITA LEVRINTS/shutterstock

არ მისცეთ კატას სათამაშოები ნაძვის ხეზე დაკიდებამდე. ის ჩათვლის, რომ მას უყიდეთ ფიფქები და ზანზალაკები და ყველა ხერხით ეცდება, რომ საკუთარი სათამაშო დაიბრუნოს. მისი გადარწმუნება გაგიჭირდებათ.

სხვა რჩევა სამწუხაროდ არ გვაქვს. რა თქმა უნდა, ფისოები დაუმორჩილებლები არიან, მაგრამ მათ სასარგებლოდ უნდა აღინიშნოს, რომ ზამთრის გარდა, წლის სხვა პერიოდში ნაძვის ხეებს არ ერჩიან :)