პარლამენტარი ოთო კახიძე, საქართველოს ექსპრემიერის, ზურაბ ჟვანიას, საქმის სამედიცინო ექსპერტის ლევან ჩაჩუას უდანაშაულობაზე მიღებულ გადაწყვეტილებას ეხმაურება და ქართულ ოცნებას ცილისწამებაში ადანაშაულებს:

"კიდევ ერთხელ აეხადა ფარდა ქართული ოცნების ცილისწამებას და მიცვალებულის სახელით სპეკულირებას. დადგინდა, რომ ზურაბ ჟვანიას საქმეზე ექსპერტი ლევან ჩაჩუა იყო უდანაშაულო და მას როგორი დასკვნაც ჰქონდა ჩატარებული, ეს იყო სწორი".

ზურაბ ჟვანიას ძმა გოგლა ჟვანია კი ამბობს, რომ საქმეზე მიმდინარე გამოძიებამ მოლოდინები არ გაუმართლა, ხოლო ექსპერტ ლევან ჩიჩუასთან დაკავშირებული საკითხი ჟვანიას საქმეში მისთვის მაინც ბოლოხარისხოვნად რჩება.

უზენაესმა სასამართლომ ძალაში დატოვა სააპელაციო სასამართლოს გადაწყვეტილება ლევან ჩაჩუას უდანაშაულობასთან დაკავშირებით და პროკურატურის საჩივარი წარმოებაში არ მიიღო.

ლევან ჩაჩუა საქართველოს მთავარმა პროკურატურამ 2014 წელს სამსახურეობრივი გულგრილობის ბრალდებით დააკავა. პროკურატურის გამოძიების თანახმად, მან სრულყოფილად არ აღწერა ჟვანიას გვამზე არსებული დაზიანებები.