წინა მოწვევის პარლამენტის დეპუტატმა და ზურაბ ჟვანიას ძმამ გოგლა ჟვანიამ გაზეთ კვირის პალიტრასთან ექსკლუზიურ ინტერვიუში განცხადა, რომ მისი ძმის საქმეზე გამოძიების მიმდინარეობამ მოლოდინები არ გაუმართლა, რადგან საკმარისი მყარი მტკიცებულებები ვერ აღმოაჩინეს საქმის გასახსნელად.

გოგლა ჟვანიას თქმით, გამოძიების პროცესში ინფორმაციამ გაჟონა, იმ გახმაურებულ ფირის სახით, რომელიც ჰაკიმ ფაშას სახელით გავრცელდა:

"გამოძიებასაც ჰქონდა ამ საქმის ცოტა უფრო ადრე გახსნის იმედი, იქედან გამომდინარე, რომ მნიშვნელოვანი მტკიცებულებები გამოჩნდა. თუმცა, იმისათვის, რომ სიმართლე მყარი მტკიცებულებებით დაამტკიცო, თურმე მეტია საჭირო".

გოგლა ჟვანია ფიქრობს, რომ საბოლოოდ, გამოძიება ლოგიკურ დასასრულამდე მივა. მისი აზრით, იგი აქამდე უცხოელი ექსპერტების ჩართვამ შეაფერხა, რადგან ამას წინ უძღოდა ხანგრძლივი მოლაპარაკებები, შეკითხვების გადაგზავნა, პასუხების მიღება:

"ზოგიერთმა [ექსპერტმა] მიწერ-მოწერის შემდეგ განაცხადა, ეს ძალიან მაღალი პოლიტიკური ინტერესის მქონე საქმეა და მასში ჩართვაზე უარს ვაცხადებო. ასეთი თემები იწვევს საქმის გაჭიანურებას".

მიუხედავად ამისა, გოგლა ჟვანია ფიქრობს, რომ თუკი, ექსჰუმაციის საკითხი ისევ აქტუალური გახდება, პროცესი უცხოელი ექსპერტების ჩართვით უნდა წარიმართოს.

მას საეჭვოდ მიაჩნია ლევან სამხარაულის საქმეც:

"პრემიერის გარდაცვალებიდან სამი თვის თავზე ექსპერტიზის ბიუროს ხელმძღვანელის ლევან სამხარაულის მკვლელობის ფაქტი საეჭვოა, რადგან ის ზურას საქმის გამოძიების დეტალებზე სრულად იყო ინფორმირებული".

რაც შეეხება ექსპერტ ლევან ჩიჩუას, გოგლა ჟვანია ამბობს რომ მასთან დაკავშირებული საკითხი ჟვანიას საქმეში მათთვის მაინც ბოლოხარისხოვნად რჩება.

ზურაბ ჟვანია 2005 წლის 3 თებერვალს გაურკვეველ ვითარებაში გარდაიცვალა. ოფიციალური ვერსიით, იგი გასათბობი მოწყობილობიდან გაჟონილი მომწამვლელი ნახშირჟანგის აირით დაიღუპა.