პარლამენტში ევროპული საქართველოს დეპუტატი, გიორგი კანდელაკი ამბობს, რომ ყველა ფრენის ერთი თვით გაუქმებით, საქართველო ევროკავშირს ეუბნება, რომ მათ სიაში მოხვედრა პრიორიტეტული არაა.

მისივე თქმით, სიის გამოქვეყნებამდე ერთი დღით ადრე ფრენების გაუქმება უცნაურია, რადგან ინასწარი ინფორმაციით საქართველო ამ სიაში უნდა ყოფილიყო:

"არ ჯობდა დავლოდებოდით ამ სიას? იქნებადა წერია იქ საქართველო? ყველა ფრენის ერთი თვით გაუქმებით საქართველო ევროკავშირს ერთგვარად ეუბნება, რომ ამ სიაში მოხვედრა მისი პრიორიტეტი არაა. ცნობისათვის, ევროკავშირი საზღვრებს უკვე უხსნის ბალკანეთის ქვეყნებს, რომელთაც ჩვენზე უკეთესი სტატისტიკა ნამდვილად არ აქვთ".

დღეს, 25 ივნისს სამოქალაქო ავიაციის სააგენტოს ინფორმაციით, საერთაშორისო რეგულარული საჰაერო მიმოსვლაზე შეზღუდვები 2020 წლის 31 ივლისის ჩათვლით გახანგრძლივდა და მიმოსვლა პირველ აგვისტომდე არ აღდგება. მათი თქმით, უკვე აცნობეს ავიაკომპანიებს, რომლებიც რეგულარულ რეისებს ახორციელებენ საქართველოს მიმართულებით.

გარდა ამისა, სააგენტო აცხადებს, რომ რეგულარული საჰაერო მიმოსვლის აღდგენამდე, გაგრძელდება მრავალჯერადი ჩარტერული რეისების რამდენიმე მიმართულებით. მათი თქმით, აღნიშნულ ავიარეისებთან დაკავშირებული ინფორმაცია ცნობილი გახდება ფრენის ნებართვების მინიჭებისთანავე.

ამასთან, Euronews წყაროზე დაყრდნობით იმ ქვეყნების სიას აქვეყნებს, რომელსაც ევროკავშირი პირველი ივლისიდან საზღვრებს უხსნის. მათ შორის მოხვდა საქართველოც.

როგორც გამოცემა აღნიშნავს, ევროკავშირის წარმომადგენლებს შორის დებატები სიასთან დაკავშირებით 25 ივნისს შეთანხმების გარეშე დასრულდა და განხილვას ხვალ, 26 ივნისს გააგრძელებენ.