პარლამენტის შენობასთან მწვანე ღობეს მეორე ღობე დაემატა. როგორც თბილისის მერიაში On.ge-ს განუმარტეს, ტროტუარის დარჩენილ ნაწილზე ფილები უნდა შეიცვალოს, რის გამოც ღობე წინ წამოიწია.

"ღობის ის ნაწილი რაც იყო, რჩება, დასამატებელი რაც იქნება, დაემატება. არის რუტინული სამუშაო", — აღნიშნეს მერიაში.

მათივე თქმით, მოქალაქეებისთვის ტროტუარზე გასასვლელი დარჩება.

ფოტო: ხატია ღოღობერიძე / On.ge

ფოტო: ხატია ღოღობერიძე / On.ge

ფოტო: ხატია ღოღობერიძე / On.ge

სარეაბილიტაციო სამუშაოების ირგვლივ დადგმულ მწვანე ღობეზე აქტივისტების მიერ გაკეთებული საპროტესტო წარწერებია. "სირცხვილია", "ბიძინას ბოსტანი", "გადადექი" და სხვა ფრაზები მას შემდეგ დააწერეს მასზე, რაც მერიამ მალხაზ მაჩალიკაშვილის კარავი აიღო, ჯერ იქ საახალწლო ატრაქციონები მოაწყო, მერე კი ტერიტორიის რეაბილიტაცია დაიწყო. საახალწლო ატრაქციონები 2019 წლის 31 დეკემბერს აქტივისტებთან დაპირისპირებისა და დაკავებების ფონზე დაიდგა.

პარლამენტის წინ მიმდებარე ტერიტორიაზე სარეაბილიტაციო სამუშაოები 22 ივნისს დაიწყო. საკანონმდებლო ორგანოს გარშემო მწვანე ღობე სწორედ მაშინ აღმართეს. როგორც თბილისის მერმა, კახა კალაძემ განაცხადა, სამუშაოები ივლისის ბოლოს დასრულდება.