მართალია, ერთგულ მაყურებლებს ჯერ არ უხილავთ ურბანული ფენტეზის ჟანრის ცნობილი სერიალის Lucifer მეხუთე სეზონი, თუმცა უკვე ვიცით, მათ ამ შოუსთან დამშვიდობება მეექვსე სეზონის შემდეგ მოუწევთ.

ლუციფერი პირველად 2016 წელს გამოჩნდა ეკრანებზე, სამი სეზონის გამოსვლის შემდეგ კი ტელეკომპანია Fox-მა მასზე მუშაობა შეაჩერა, თუმცა მისი წარმოების უფლებები ნეტფლიქსმა შეისყიდა და სერიალიც განაახლა.

სულ ცოტა ხნის წინ ტვიტერის ოფიციალურ ანგარიშზე გავრცელებული ინფორმაციით კი ცნობილი გახდა, რომ სერიალი მეექვსე სეზონით დასრულდება.

ჯერჯერობით უცნობია, თუ რამდენი ეპიზოდი იქნება ფინალურ სეზონში. ყველაზე ხანგრძლივი სეზონი მესამე იყო, რომელიც 26 სერიისგან შედგება.

ამ ინფორმაციის გავრცელებამდე კი ნეტფლიქსმა ლუციფერის მეხუთე სეზონის გამოსვლის თარიღი დააანონსა: 21 აგვისტო.

ამ სატელევიზიო შოუს ჯერჯერობით ბოლო, მეოთხე სეზონი 2019 წლის 8 მაისს გამოვიდა და მას შემდეგ მაყურებლები მოუთმენლად ელიან ისტორიის გაგრძელებას. მეხუთე სეზონში 16 ეპიზოდი იქნება და როგორც ამ საოცრად სექსუალური ვიდეოთი გვამცნეს, სეზონის პირველი ნახევარის ხილვა აგვისტოში შეგვეძლება.