პარლამენტის ვიცე-სპიკერის, კახა კუჭავას თქმით, ევროპარლამენტარებისთვის გაგზავნილი წერილი საინფორმაციო ბიულეტენია, რომელითაც გამომწერებს "მათი მხრიდან დანახულ" ინფორმაციას აწვდიან. ამ თემაზე კომენტარი მან მედიასთან გააკეთა.

"გადავაგზავნით ჩვენს არა მარტო ევროპარლამენტარებთან, არამედ ყველასთან ვისაც გამოწერილი აქვს სიახლეები და ვისაც აქვს უფლება, მიიღოს ინფორმაცია უკვე ჩვენი მხრიდან დანახული, ამიტომ ნურავის გაუკვირდება, თუ თვითონ აგზავნიან, ასეთივე წერილები იგზავნება ჩვენგანაც, ამისთვის მუშაობს სპეციალური სამსახური პარტიაში, რომელიც კონკრეტულ ფაქტებზე დაყრდნობით ქმნის სიახლეების ბიულეტენს და აგზავნის პერიოდულად ყველგან", — თქვა კახა კუჭავამ.

კუჭავას განმარტებით, ქართული ოცნება მსგავს "სიახლეების ბიულეტენს" კვირაში ერთხელ-ორ კვირაში ერთხელ აგზავნის.

მთავარი არხის მეწილის, გიორგი რურუას ადვოკატების განცხადებით, ქართულმა ოცნებამ ევროპარლამენტარებს წერილით მიმართა. მათივე ინფორმაციით, წერილში საუბარია 1993-1994 წლებზე და მხედრიონზე.

ამასთან, ადვოკატებმა წარმოადგინეს დოკუმენტი საქართველოში შინაგან საქმეთა სამინისტროს საინფორმაციო-ანალიტიკური დეპარტამენტიდან, რომლის მიხედვითაც, უწყებაში წარსულში გიორგი რურუას სისხლისსამართლებრივ პასუხისგებაში მიცემასთან დაკავშირებით ინფორმაცია არ მოიპოვება.

ადვოკატ დიმიტრი საძაგლიშვილის თქმით, ქართული ოცნების წერილში მითითებულია, რომ რურუას წინააღმდეგ საქმეები მიმდინარეობდა, თუმცა ნაციონალური მოძრაობის ხელისუფლებაში ყოფნის დროს შეწყდა. თუმცა, საძაგლიშვილი აღნიშნავს, რომ მის მიმართ წინა წლებთან დაკავშირებით კითხვები არ დასმულა არც ქართული ოცნების პერიოდში.

დიმიტრი საძაგლიშვილის აზრით, სავარაუდოდ, ქართული ოცნება ამ წერილით ევროპარლამენტარების წინაშე გიორგი რურუას პატიმრობის გამართლებას ცდილობს. მისი ინფორმაციით, წერილი რამდენიმე დღის წინ გაიგზავნა.