სამგორის რაიონში, ვარკეთილის ხევში ახალი რეკრეაციული სივრცე მოეწყობა. ამის შესახებ თბილისის მერმა, კახა კალაძემ დღეს დედაქალაქის მთავრობის სხდომაზე განაცხადა.

როგორც მან აღნიშნა, პარკის ტერიტორია, რომელიც დაახლოებით, 3 ჰექტარს მოიცავს, პასიურ და აქტიურ დასვენების ზონად დაიყოფა. მისივე თქმით, საპროექტო სამუშაოების პირველი ეტაპი დასრულებულია. კალაძის ვარაუდით, პროექტის დაწყება ზაფხულის ბოლოს შესაძლებელი იქნება.

"ვფიქრობთ, რომ სრული პროექტი დაახლოებით, ერთ თვეში გვექნება და უშუალოდ სამუშაოების განხორციელებას დავიწყებთ. გამოვაცხადებთ ტენდერს, გვეყოლება გამარჯვებული კომპანია, რომელიც ამ სამუშაოებს შეასრულებს", — განაცხადა კალაძემ.

მისი თქმით, ტერიტორიაზე საჩრდილობლებით მოსასვენებელი სივრცეები, დატვირთული ატრაქციონებით საბავშვო მოედნები, ასევე, სპორტული და სავარჯიშო მოედნები, ღია ამფითეატრი, შადრევანი, ველობილიკი, ძაღლების სასეირნო და სავარჯიშო სივრცე, სკეიტ პარკი და გადმოსახედი ბაქანი მოეწყობა.

მისივე თქმით, პროექტის ფარგლებში, განახლდება არსებული საფეხმავლო ხიდიც და პარკის ტერიტორია შეივსება ახალი ხე-მცენარეებით და გაჩნდება საპიკნიკე არეალები.